پاکستان ټوډې: عمران خان منکر شوی، افغان او بنګالي ماشومانو ته د پاکستان تابعیت نه ورکوي

عمران خان په پاکستان کې زږېدلو افغان او بنګالیو ماشومانو ته د تابعیت له ورکړې منکر شوی دی. د پاکستاني رسنیو د راپورونو له مخې عمران خان له خپلې هغه خبرې په شا شوی، چې ویلي یې وو، په پاکستان کې زږېدلو بنګالي او افغان ماشومانو ته به د پاکستان تابعیت ورکوي. پاکستان ټوډې ورځپاڼې په یوه مطلب کې ویلي، عمران خان له خپلې دغه خبرې په شا شوی دی او نه غواړي خپلې څرګندونې عملي کړي. څه موده وړاندې د پاکستان لومړي وزیر عمران خان په کراچۍ کې یوې غونډې ته د وینا پر مهال وویل، چې د نړیوالو قوانینو له مخې به په پاکستان کې زږېدلو افغان او بنګالي ماشومانو ته د پاکستان تابعیت ورکوي او په دې توګه دوی کولی شي په راتلونکې کې پخپله خوښه دوه تابعیته وګړي وي.