مېلر او باجوه د افغان سولې په اړ خبرې کړې دي

لوړپوړو امریکايي او پاکستاني پوځيانو د افغان سولې په اړه خبرې کړې دي. د رسنیو د راپورونو له مخې په افغانستان کې د امریکايي او ناټو ځواکونو عمومي قومندان جنرال سکاټ مېلر پاکستان ته تللی دی او هلته یې د پاکستاني پوځ له لوی درستیز جنرال قمر جاوید باجوه سره کتلي دي. دواړو لورو په دې لیدنه کې په افغانستان کې د سولې په اړه بحثونه کړي دي. د پاکستان د پوځ مشر په دې لیدنه کې ویلي، چې د افغانستان سوله د پاکستان د سولې او ثبات لپاره مهمه ده، نو ځکه اسلام اباد په دې برخه کې همکارۍ ته تیار دی. دواړو لورو همدا راز ټینګار کړی چې په افغانستان کې روانه جګړه دداسې مذاکراتو پر مټ پای ته رسېدلی شي چې مشري او مالکیت یې افغانان وکړي. امریکايي لوري له پاکستان غوښتي چې د افغانستان د سولې په پروسه کې خپلې همکارۍ و نه سپموي. پاکستاني اړخ ژمنه کړې چې دوی به د افغانستان د سولې له پروسې سره هر اړخیزه همکاري کوي.