پنټاګون: ایران په افغانستان کې له ځينو سیاسي څېرو او نوماندانو ملاتړ کوي

ایران په افغانستان کې له یو شمېر سیاسي څېرو او کاندېدانو مالي او معنوي ملاتړ کوي. د امریکا ددفاع وزارت په یوه راپور کې راغلي چې ایران د افغانستان پر وړاندې دوه مخې لوبه پيل کړې ده. د سرچینې په وینا ایران له یوې خوا د افغان حکومت ملاتړ کوي، خو له بلې خوا د طالبانو په ګډون دداسې سیاسي څېرو ملاتړ کوي چې په افغانستان کې د ایران ګټې خوندي کړي. پنټاګون وایي افغان امنیتي سرچینو هم ورته ویلي، چې ایران د افغانستان په ځينو ولایتونو کې ځایي چارواکو ته رشوتونه ورکوي. سرچینه کاږي، ایران غواړي په افغانستان کې دداعش ډلې مخه ونیسي، خپل پلویان په افغان حکومت کې ځای پر ځای کړي، د اوبو ستونزه حل کړي او غواړي پلویان یې په افغانستان کې د ایران ګټې خوندي کړي. تر دې وړاندې هم په افغانستان کې د ایران د لاسوهنو په اړه راپورونه خپاره شوي دي. ایران په دې تورن دی چې طالبان روزي او دوی ته وسلې ورکوي. ګڼو افغان چارواکو هم دغه ادعا کړې ده.