په ترخم کې شته ستونزې لا هم د افغان سوداګرو لپاره لوی خنډ دی

د ننګرهار ولایت د سوداګرۍ او صنایعو خونه وايي چې په تورخم کې شته ستونزو افغان سوداګر اندېښمن کړي دي. د دغه خونې عامل رئیس شمس الحق مجاهد وايي، درې میاشتې کېږي چې په تورخم کې له ۲۰۰۰ زیات کانټینرونه ولاړ دي چې په‌دې کې یې ۵۰۰ د سکرو د ډبرو دي. نوموړی وايي، دا چاره په کراچۍ کې د کانټینرونو د بیو د لوړوالي لامل ګرځېدلی او په ورځني ډول افغان سوداګرو ته په لسګونه زره افغانۍ تاوان رسېږي. دی له حکومت غواړي چې یاده ستونزه ژر تر ژره هواره کړي. د افغانستان او پاکستان تر منځ ټرانزیټي ستونزه پخوانی ده، نو ځکه افغان سوداګر ورته اندېښمن دي.