م م: تېر کال کې مو۱۳ میلیونه افغانانو ته خوراکي مرستې وېشلې

ملګرو ملتونو په تازه خپاره کړي راپور کې ویلي، چې په ۲۰۲۳ کال کې یې ۱۳ میلیونه افغانانو ته خوراکي مرستې وېشلې دي او ادعا یې کړې، چې د ۲۰۲۱ کال اګسټ راوروسته د دوی بشري مرستو میلیونونه افغانان له قحطۍ ژغورلي او د اقتصادي پرځېدا مخه یې نېولې ده. په راپور کې دغه راز ویل شوي، چې د هرات زلزلو او له ګاونډیو هېوادونو څخه د افغانانو راستنېدنه د ۲۰۲۳ کال تر ټولو لویې ستونزې وې او دا یې وښوده چې افغانستان کې دوامداره نړۍوال ملاتړ او ښکېلتیا ته اړتیا ده. د یوناما مرستیال او افغانستان کې د ملګرو ملتونو بشري مرستو همغږي کوونکي اینډریکا راټواټه په دغه راپور کې ادعا کړې، خوړو ته نه لاسرسی د افغانانو لویه ستونزه ده او په خبره یې چې په ۲۰۲۴ کال کې به نږدې ۱۶ میلیونه افغان وګړي د خوړو له نه خوندیتوب سره مخ شي.