مودي: د چابهار بندر له لارې افغانستان او منځنۍ اسیا سره نښلوو

د هندوستان لومړي وزیر نرېندرا مودي له یوې هندۍ رسنۍ سره په مرکه کې ویلي، چې ډيلي هڅه کوي د چابهار بندر له لارې افغانستان او منځنۍ اسیا سره ونښلوي او سوداګریزې راکړې ورکړې پراخې کړي. په دې وروستیو کې هند او ایران د چابهار بندر د فعالیت لس کلن تړون لاسلیک کړ. د هندوستان ټایمز ورځپاڼې پرون د نرېندرا مودي له قوله لیکلي دي «هند د چابهار بندر له لارې نه یوازې د سیمه ییز اتصال، سوداګرۍ او سوداګرۍ ته وده ورکولو ته ژمن دی، بلکې د شمال-جنوب د نړۍوال ټرانسپورت دهلېز له لارې د منځني ختیځ – اروپا اقتصادي دهلېز ته هم ژمن دی.« دا په داسې حال کې ده، چې د تېرې اونۍ د دوشنبې په ورځ ډیلي او تهران یو لس کلن دوه اړخیز تړون لاسلیک کړ، چې له مخې یې هند کولای شي خپل سوداګریز توکي افغانستان او د منځنۍ اسیا هېوادونو ته صادر کړي.