نن د جون ۲۶ د مخدره موادو پر ضد نړیواله ورځ په داسې حال کې نمانځل کیږي چې اوسني افغان سرپرست حکومت په دې برخه کې د پام وړ پرمختګونه کړي دي. د حکومت هڅې د مخدره موادو د کښت او استعمال پر وړاندې د پام وړ لاسته راوړنې لرلې دي. د دې پرمختګونو ستاینه او ملاتړ لازمي دی، خو باید لا ډېر کار وشي ترڅو دا ستونزه په بشپړ ډول له منځه یوسي.
افغان حکومت په نشو د روږدو کسانو راټولولو او درملنې لپاره ځانګړې هڅې پیل کړې دي. دا هڅې په افغانستان کې د نشې پر وړاندې د مبارزې یوه مهمه برخه ده. په نشو روږدي کسان راټول شوي، او د درملنې پروسې ته ور وړل کیږي. دا اقدام نه یوازې د خلکو ژوند ژغوري، بلکې ټولنې ته هم د امن او سوکالۍ پیغام رسوي. د حکومت دغه هڅې د ټولنې د روغتیا د ښه والي او د کورنیو د ژوند د ثبات لپاره ډېره مهمه ده.
دغه راز د مخدره موادو د کښت د منع کولو برخه کې د حکومت هڅې هم د پام وړ دي. د کوکنارو کښت چې په تېرو کلونو کې د ډېرو کورنیو لپاره د عاید یوازینۍ سرچینه وه، اوس د حکومت له خوا منع شوی دی. دا پرېکړه د افغانانو او نړیوالې ټولنې له خوا د ستایلو وړ ده، ځکه چې دا د ټولنې لپاره د اوږدمهاله ثبات او پرمختګ لامل کیږي. د کوکنارو د کښت منع کول د مخدره موادو د تولید او قاچاق پر وړاندې یو مهم ګام دی، چې په نړیواله کچه د امنیت او ثبات د راوستلو لپاره مهم دی.
خو د دې ټولو پرمختګونو سره سره، حکومت باید له درملنې وروسته روغو شويو کسانو ته د کاري فرصتونو برابرولو ته ځانګړې پاملرنه وکړي. که چېرې دغه کسان له درملنې وروسته بې کاره پاتې شي، نو د دې امکان شته چې بیا نشې ته مخه کړي. د دې لپاره حکومت باید په بېلابېلو برخو کې کاري فرصتونه پیدا کړي او د دې کسانو لپاره مسلکي زده کړې پروګرامونه پیل کړي. د کار روزګار برابرول به نه یوازې د هغوی اقتصادي وضعیت ښه کړي، بلکې دوی به ټولنې ته د بیا رغیدو په لاره کې هم مرسته وکړي.
همدارنګه، د کوکنارو نه کرلو په بدل کې بزګرانو سره هر اړخیزه مرسته کول هم ضروري ده. دا بزګران چې مخکې یې له کوکنارو څخه عاید ترلاسه کاوه، اوس اړتیا لري چې بدیل محصولات وکري. حکومت باید د دوی لپاره د نویو کرنیزو ټکنالوجیو او تخنیکونو معرفي کولو سره مرسته وکړي. همدارنګه، د نویو بازارونو پیدا کول او د بزګرانو محصولاتو ته نړیوال مارکیټ ته لاسرسی برابرول هم باید د حکومت په لومړیتوبونو کې شامل وي. بزګرانو ته د نویو تخمونو، کیمیاوي سرو او اوبو رسولو سیستمونو ته لاسرسی برابرول به د دوی د ژوند کیفیت لوړ کړي او دوی به وهڅوي چې د کوکنارو پر ځای قانوني محصولات وکري.
د افغانستان لپاره د مخدره موادو پر وړاندې مبارزه یوه اوږده او پیچلې لار ده. د اوسني حکومت هڅې د ستایلو وړ دي، خو لا ډېر کار پاتې دی. نړیواله ټولنه او په ځانګړې توګه د افغانستان دوستان باید په دې برخه کې له افغان حکومت سره مرسته وکړي. د دې ستونزې د حل لپاره یوه ګډه او پراخه ستراتیژي اړینه ده، چې په ترڅ کې یې ټولې اړوندې خواوې په ګډه کار وکړي.
په پای کې، د مخدره موادو پر وړاندې د مبارزې نړیواله ورځ د دې لپاره یو ښه فرصت دی چې د حکومت د هڅو ستاینه وکړو او راتلونکي لپاره یو روښانه او مخ په پرمختګ افغانستان ته هیله ولرو. د دې سترې ستونزې د حل لپاره هر یو افغان باید خپله برخه ادا کړي او په ګډه کار وکړو ترڅو د مخدره موادو څخه پاک او سوکاله افغانستان ولرو. د حکومت د پالیسیو ملاتړ او د ټولنې هر .فرد همکاري کولای شي چې زموږ هېواد د یو روښانه او ښه راتلونکي پر لور بوځي
