د افغانستان مخ پر زیاتیدونکی نفوس او د پالیسیو نشتوالی

په وروستیو کلونو کې، افغانستان د نفوس په برخه کې د پام وړ زیاتوالی تجربه کوي. د ملګرو ملتونو د بشري مرستو د څانګې د مشرې په وروستي راپور کې ښوول شوي چې د افغانستان نفوس نژدې ۴۸ میلیونو ته رسیدلی دی. دا په داسې حال کې ده چې شل کاله وړاندې د اساسي قانون جوړیدو پر مهال د افغانستان نفوس ۲۵ میلیونه اټکل شوی و. د دې معنا دا ده چې په تېرو شلو کلونو کې د افغانستان نفوس دوه برابره زیات شوی دی.
د دې نفوسو زیاتوالی، چې هر کال څه باندې یو میلیون نوی زیږیدلی او یا راغلی وګړی په ځان کې شاملوي، د افغانستان د ستونزو په زیاتیدو کې مهم رول لوبوي. که څه هم نفوس زیاتوالی په ځینو مواردو کې یو فرصت ګڼل کیږي، خو په افغانستان کې دا چاره په ځانګړي ډول د کار مارکیټ په برخه کې، چې له مخکې نه هم د بېکارۍ ستونزې سره مخ دی، جدي ننګونې رامنځته کړي دي. که دغه وضعیت دوام وکړي، بشري ناورین په اتومات ډول پراخیږي او د افغانستان اقتصادي وده د سختو ستونزو سره مخ کیږي.
په داسې حال کې چې د کار مارکیټ پراختیا او د نوي کارموندنې فرصتونو رامنځته کول باید د لومړیتوبونو په سر کې وي، خو تر اوسه پورې داسې ښکاري چې په دې برخه کې ستراتیژیکو پالیسیو او د حل لارو نشتون د ستونزو د زیاتیدو لامل شوی دی. د افغان حکومت او نړیوالو همکارانو لپاره اړینه ده چې په دې برخه کې ژور فکر او د ستراتیژیکو پالیسیو جوړیدو ته جدي پام وکړي.
د بشري وضعیت د ښه کولو لپاره د نړیوالو مرستو رول هم نشي له پامه غورځولای، خو دا مرستې یوازې یو لنډمهاله حل ګڼل کیږي. په افغانستان کې د پایدارې اقتصادي ودې لپاره اړتیا ده چې د کار فرصتونه رامنځته شي، تعلیمي او فني مهارتونه وده وکړي، او بنسټیزې اقتصادي اصلاحات پلي شي.
د افغانستان مخ پر زیاتیدونکي نفوس او د بشري ناورین د مخنیوي لپاره، اړینه ده چې د ستراتیژیکو پالیسیو جوړول او د ټولنې هر اړخیزه پراختیا په لومړیتوب کې ځای ولري. د افغانستان حکومت او نړیوالې ټولنې ته په کار ده چې په ګډه د دې ستونزو د حل لپاره د اوږدمهاله او پایدارو لارو چارو په موندلو کې همکاري وکړي، تر څو د افغانستان راتلونکی له اقتصادي او بشري ناورین څخه خوندي شي.
ددې ټولو ترڅنګ، د پوهاوي کچه باید لوړه شي، تر څو خلک د نفوس د زیاتوالي پر عواقبو پوه شي او په دې برخه کې د خپلې ونډې په اړه پوره معلومات ولري. د افغانانو لپاره اړینه ده چې په ګډه کار وکړي او د خپل راتلونکي په اړه غوره تصمیمونه ونیسي. د حکومتي او غیر حکومتي سازمانونو، رسنیو، او د عامه پوهاوي پروګرامونو له لارې باید د نفوس زیاتوالي او د دې له امله رامنځته کیدونکو ستونزو په اړه پوهاوی لوړ شي.
په پایله کې، د افغانستان د نفوس د زیاتوالي موضوع یوه جدي ستونزه ده چې د اوږدمهاله او ستراتیژیکو پالیسیو جوړیدو ته اړتیا لري. یوازې په دې توګه به وکولای شو د بشري او اقتصادي ناورین مخه ونیسو او د افغانستان راتلونکی روښانه او له ستونزو په امان کړو .