اروپايي ټولنې په ټینګار سره ویلي، چې د منځنۍ اسیا هېوادونه دې د بشري حقونو، ازادیو او ډیموکراټیکو او سیاسي اصلاحاتو ته پام وکړي.
دا په داسې حال کې ده چې د منځنۍ اسیا پر ځینو هېوادونو له دې کبله توندې نيوکې کېږي، چې اوسېدونکي یې له پوره بشري حقونو برخمن نه دي او وخت ناوخت له زور زیاتي سره مخ کېږي.
د اروپايي ټولنې د بهرني سیاست مشرې فېدرېکا موګیرېني په قرغزستان کې له رسنیو سره د خپرو پر مهال ټینګار کړی، چې د منځنۍ اسیا هېوادونه باید د بشري حقونو په برخه کې ښهوالی راولي.
هغې ویلي، د بشري حقونو او ازادیو تامین او اصلاحات به په منځنۍ اسیا کې د بهرنیو پانګونو د جلبېدو چانس زیات کړي.
موګرېني ټینګار کړی چې اروپايي ټولنه تل په دغو مواردو کې د اصلاحاتو غوښتنې مطرح کړې دي. هغې ویلي: «هغوی ښايي ټول هغه شیان چې موږ یې مطرح کوو خوښ نه کړي، په خاصه توګه د بشري حقونو موضوع او د قانون حاکمیت. ځینې وخت ممکن دغسې هېوادونو ته چې د انتقال په دوره کې دي، دا مسایل سخت تمام شي، خو بیا هم پوهېږي او زه فکر کوم چې هغوی دا حقیقت هم ستایي چې موږ شفاف، ازاد او د باور وړ یو او همکاري کوو».
موګیرېني دا هم ویلي چې په سیمه کې د اصلاحاتو عملي کېدل یوه اوږده او کله ناکله دردوونکې پروسه ده.
هغې ویلي، منځنۍ اسیا باید د نورو قدرتونو اروپا، متحده ایالتونو، روسیې او چین همکارۍ ته ازاده وي.
د منځنۍ اسیا هېوادونو ته د اروپايي ټولنې د بهرني سیاست مشره داسې مهال سفر کوي، چې هلته د دې سیمې په هر یوه هېواد کې ځان ځان ته لانجې روانې دي.
په ترکمنستان کې سیاسي بندیان، په قزاقستان کې د لاریون کوونکو ځپل او د قرغزستان سیاسي جنګونه هغه مسایل دي، چې تر ډېره د موګیرېني د سفر پر مهال مطرح شوي دي.
بلخوا په ترکمنستان کې چې په نړۍ کې تر ټولو ډېر کنټرول شوی هېواد بلل کېږي، د سیاسي بندیانو او د بشري حقونو د ناسم وضعیت په اړه ترې په دې وروستیو کې راپورونه ډېر شوي دي.
د بشري حقونو فعالانو له موګیرېني غوښتي چې د منځنۍ اسیا هېوادونو چارواکي د بشري حقونو د وضعیت ښهوالي ته وهڅوي.
د بشري حقونو د څار سازمان یوې مرستیالې ریچیل دنبر پر نوموړې غږ کړی چې ترکمن چارواکو ته دې ووايي، چې اروپايي ټولنه به د رښتینو بشري حقونو د تامین په خاطر هېڅ هڅه ونه سپموي.
