د امریکا، چین، روسیې او پاکستان استازي په بېجینګ کې سره کښېناستل او د افغانستان د سولې په تړاو یې خبرې وکړې. دا غونډه مهمه ګڼل شوې او د افغان سولې لپاره د امریکا ځانګړي استازي زلمي خلیلزاد ویلي چې په دې ناسته کې د تاوتریخوالي پر کمېدو او د افغان حکومت او طالبانو ترمنځ پر مخامخ خبرو ټینګار شوی دی. د دې غونډې د ګډونوالو له خوا په یوه خپره شوې اعلامیه کې ویل شوي چې د سلا مشورو بهیر به روان ساتي او د دری اړخیزې ناستې پر بنسټ چې تېره اپرېل میاشت مسکو کې ورباندې هوکړه شوې، نورو مهمو غاړو ته به هم په راتلونکې ناسته کې د ګډون بلنه ورکول کېږي. معلومه نه ده چې نورې مهمې غاړې کومې دي.
دا د مسکو، بېجېنګ او واشنګټن د دری اړخیزو غونډو لړۍ ده چې لومړۍ یې په واشنګټن، دویمه په مسکو او درېیمه په بېجېنګ کې وشوه، خو دا ځل غونډې ته پاکستان هم وربلل شوی و. افغان حکومت په دې غونډه کې نه و او دا هم نه دي ویلي شوي چې ولې افغان حکومت دې غونډې ته نه دی وربلل شوی. اوس پوښتنه دا ده چې که طالبان له افغان حکومت سره خبرې نه کوي، نو امریکا ولې داسې مهمو غونډو ته افغان حکومت نه ورغواړي؟
اوس اوس داسې ښکاري چې د سولې په تړاو غونډو کې د افغان حکومت منزوي کول یوازې د طالبانو نه، بلکې د امریکا کار هم دی. د افغانستان په تړاو د امریکا او طالبانو ترمنځ په خبرو کې حکومت نشته، دغه راز د طالبانو او افغان سیاستوالو ترمنځ په غونډو کې هم افغان حکومت نشته، چې ښايي لامل یې طالبان وګڼل شي، خو په داسې غونډو کې هم حکومت نشته چې هلته د طالبانو دریځ رول نه لري. د امریکا او طالبانو ترمنځ د خبرو په دویم پړاو کې په متحده اماراتو کې امریکا، طالبان، سعودي، امارات او پاکستاني چارواکي ناست وو، خو د حکومت استازو له غونډې د باندې انتظار کاوه او تر پایه غونډې ته پرې نه ښودل شول. هلته چې د افغانستان پر برخلیک خبرې کېدلې د ای اېس ای رییس، سعودي او اماراتي چارواکي ناست وو، خو د حکومت د استازو ځای نه و. په څو نورو غونډو کې هم افغان حکومت هېڅ استازی نه لاره. د امریکا، چین او روسیې ترمنځ د افغانستان په تړاو په دری اړخیزو غونډو کې هم حکومت نه و. دا دی په درېیمه غونډه کې یې پاکستان ور ګډ شو، خو بیا هم افغان حکومت نه و. حکومت هم په دې تړاو غلی دی، نه خپله څه وايي او نه هم امریکا ته په ښکاره په دا ډول غونډو کې د دوی د نه ګډون اعتراض کوي. حکومت ځان خپلواک او ازاد ګڼي. د نړۍ کوم خپلواک او ازاد دولت اجازه ورکړې چې د خپل هېواد په تړاو په کېدونکې غونډه کې یې دې استازي نه وي!؟ که داسې شوي هم وي، په سرعت او شدت یې اعتراض کړی او دا ډول غونډې یې درولې دي. زموږ حکومت له بده مرغه نه په دې غونډو کې شته او نه هم داسې اعتراض کوي چې دا لړۍ ودرېږي. زموږ چارواکي د دې پر ځای چې د هېواد د برخلیک په اړه فکر او کار وکړي، پر کمپاین او بې ارزښته معاملو لګیا دي او هڅه کوي چې څه ډول خپل واک وغځوي او یو ځل بیا پنځه کاله دلته پر خلکو واکمن شي.
