امریکا پر ایران د فشارونو د زیاتولو په دوام، د ایران پر ستر مذهبي مشر ایتالله علي خامنهیي او د دغه هېواد پر نورو لوړپوړو پوځي او سیاسي چارواکو بندیزونه لګولي دي.
ایران ویلي چې د دغه هېواد پر مشرانو د امریکا بندیزونه، له واشنګټن سره د تل لپاره د ډیپلوماسۍ د بندېدو څرګندونه کوي.
د ایران د بهرنیو چارو وزارت ویاند عباس موسوي پر خپل ټوېټر په یوه پیغام کې ویلي، چې د ایران پر ستر مشر علي خامنهیي چې د دغه هېواد د ډيپلوماسۍ پلار دی، د بېګټې بندیزونو لګول د تل لپاره د ټرمپ له وارخطا دولت سره د ډيپلوماسۍ لاره تړي.
موسوي زیاته کړې چې د ټرمپ حکومت د نړیوالې سولې او امنیت لپاره ټول ایجاد شوي نړیوال میکانېزمونه لهمنځه وړي.
دا په داسې حال کې ده چې په هغه فرمان کې چې ولسمشر ډونالډ ټرمپ وړمه ورځ ورکړی، د ایران د ستر مشر ایتالله علي خامنهیي، هغه ته په نږدې کسانو او د سپاه پاسداران انقلاب ځواک پر ځینو قوماندانانو نوي بندیزونه لګولي او د امریکا د خزانې وزیر منوچین ویلي چې د ایران د بهرنیو چارو پر وزیر جواد ظریف به هم په څو ورځو کې بنديزونه ولګول شي.
ټرمپ د دغه فرمان د لاسلیک پر مهال ويلي، پر ایران فشارونه به دوام وکړي، خو زياته کړې یې ده چې امريکا له ایران سره جګړه نه غواړي.
د امريکا ولسمشر ويلي، پر ایران به فشارونو ته دوام ورکړي او دغه هېواد ته به هېڅکله اجازه ورنه کړي چې اټومي وسلې جوړې کړي.
ډونالډ ټرمپ د ایران د مشر ایتالله علي خامنهیي په ګډون، د دغه هېواد پر نورو لوړ پوړو چارواکو د بندیزونو د امر د لاسلیک پر مهال ویلي، د بېپیلوټه الوتکې د ویشتلو له پېښې پرته هم امريکا پلان درلود چې پر ایران نوي بنديزونه ولګوي.
په خلیج کې د ایران له خوا د امریکا د یوې بېپیلوټه کشفي الوتکې له ویشتل کېدو وروسته، د تهران او واشنګټن ترمنځ کړکېچ ان د احتمالي پوځي تقابل تر حده پورته رسېدلی دی.
د امریکا د خزانې وزیر ویلي چې د دغو بندیزونو په لګولو سره به د ایران د رژیم په لسګونه میلیارده ډالره بند کړي.
