د امریکا دفاع وزیر مارک ايسپر ویلي، د ناټو غړي هېوادونه د داعش ځپلو کمپاین لپاره یو موټی دي.
نوموړي دغه راز ویلي چې امریکا به په سوریه کې محدود حضور ولري او موخه به یې دا وي چې د داعش وسله وال د تېلو د تصفیې ځایونو ته لار پيدا نه کړي.
هغه زیاته کړې چې د داعش ځپلو کمپاین په دویم پړاو کې به تمرکز د هغوی د مالي سرچینو پر بندولو وي.
د ا مریکا دفاع وزیر ویلي چې د امریکا محدود حضور به پیاوړی کړي. هغه د بلجیم په پلازمېنه بروکسل کې په خبري غونډه کې په دې اړه د نورو جزیاتو له ورکولو ډډه کړې ده. نوموړي دغه راز ټینګار کړی چې په سوریه کې یې موخه د پخوا په څېر د داعش د ائتلاف ځپل دي.
نوموړي ویلي چې د تېلو د تصفیه ځایونو د کمولو موخه دا ده چې د داعش وسله وال د وګړو د جلب او جذب او د وسلو د اخیستلو لپاره مالي سرچینې تر لاسه نه کړي، ځکه د ده په خبره، په هغه صورت کې به د داعش ماتول ګران کار وي.
مارک ايسپر په سوریه کې د کُردانو په مشرۍ د ازادې سوریې له ځواکونو سره هم د تماسونو خبره کړې ده. هغه ویلي: «موږ له هغوی (د ازادې سوریې ځواکونو) سره اړیکې لرو، هغوی موږ ته ډاډ راکړی چې د هغوی په تر واک لاندې سیمو کې د داعش ټول زندانیان امن دي، دا ښه خبر دی، ما د ترکیې له دفاع وزیر سره هم خبرې کړې او هغه ډاډ راکړی چې د هغوی په سیمو کې هم د داعش زندانونه تر کنټرول لاندې دي، هغوی ځینې نور داعشیان هم راټول کړي چې ښه خبر دی».
د یادونې ده چې د امریکا دفاع وزیر په بروکسل کې د ناټو تړون د دفاع وزیرانو تر غونډې وروسته، خبریالانو ته دا معلومات ورکړي دي.
مارک ايسپر پر ترکیه هم غږ کړی چې له کړې ژمنې سره سم د سوریې په شمال کې بشري وضعیت ته پام وکړي، مذهبي او توکمي لږکیو ته امنیت ورکړي او د جنګي جرمونو ادعاوې وڅېړي.
دا په داسې حال کې ده چې د ترکیې حکومت د اکټوبر په نهمه، د سوریې په شمال کې د کُرد ځواکونو پر ضد پوځي عملیات پیل کړل، خو د امریکا دفاع وزیر ویلي چې د ترکیې دا عملیات د توجیه وړ نه دي.
