بمبئ کې اور لګېدنه؛ ۲۲ کسانو ته مرګ ژوبله اوښتې

د هندي رسنیو د راپورونو له مخې، د دغه هېواد په ستر ښار بمبئ کې په یوه اورلګېدنه کې ۲۲ کسانو ته مرګ ژوبله اوښتې ده. د هندو ورځپاڼې راپور ورکړی دی چې دا پېښه د بمبئ په مرکز تاردیو سیمه کې رامنځته شوې ده چې په نتیجه کې یې اووه کسان مړه شوي او ۱۵ نور ټپيان شوي دي. ورځپاڼې د بمبئ د ښاروال بریهان بمبئ له قوله ویلي چې دا پېښه په یو لوړ هستوګنیز بلاک کې رامنځته شوې ده چې له امله یې کورونه هم سخت زیانمن شوي دي. هغه زیاته کړې چې د اور وژنې ډله سیمې ته رسېدلې ده او اور یې اوس کنټرول کړی دی. دا چې د اورلګېدنې علت څه و، هغه یې په اړه څه نه دي ویلي.