بهرنیو چارو وزارت: بریتانيا دې په غټ زړه سره تعامل ته را وړاندې شي

د بهرنیو چارو سرپرست وزیر د افغانستان لپاره د بریتانيې له شارژدافیر رابرټ چاترټن ډکسن سره پر یو شمېر مسایلو خبرې اترې کړې دي. د بهرنیو چارو وزارت مرستیال ویاند پر خپله ټویټر پاڼه لیکلي، چې لیدنه کې افغانستان کې پر شته امنیت، سوداګرۍ، دوه اړخیزو اړیکو، نشه يي توکو سره پر مبارزې، بریټانیې کې د افغان کډوالو پر ستونزو او یو شمېر نورو مسایلو خبرې شوې دي. د بریتانيې شارژدافیر رابرټ چاترټن ډکسن په دې لیدنه کې ویلي، چې له لسیزو وروسته په افغانستان کې امن او ثبات رامنځته شوی، چې له دغه فرصته بايد په سوداګريز، روغتيايي او تعلیمي ډګرونو کې ګټه پورته شي. نوموړي دغه راز هیله څرګنده کړې، چې د بریتانيا او افغانستان ترمنځ په اړیکو کې به ښه والی رامنځته شي. د بهرنیو چارو سرپرست وزیر د بریتانیا له شارژدافیرڅخه غوښتنه کړې چې بریتانیا کې د افغانانو لپاره د کونسلي چارو پيل ته زمینه برابره کړي.