شاوخوا درې میاشتې وړاندې باید بین الافغاني خبرې پیل شوې وای، خو لا هم نه یوازې دا چې دا خبرې پیل شوې نه دي، بلکې ښکاریږي چې شته خنډونه به د دې خبرو پیل او بریا له ستونزو سره مخ کړي. که څه هم ویل شوي چې په جولای میاشت کې به دا خبرې پیل شي، خو د ښکېلو اړخونو ارادو او کړنو ته په کتو سره بیا هم د ځنډ احتمال شته.
ولې بین الافغاني خبرې نه پیلېږي، اصلي خنډونه څه دي، څوک زیان کوي او څوک مسوول دي؟
د بین الافغاني خبرو د پیل پر وړاندې دوه اساسي خنډونه وو. لومړی دا چې پینځه زره طالب بندیان باید خوشي شوي وی چې حکومت یې خوشي کولو ته تیار نه و. دویم دا چې طالبان له افغان حکومت سره خبرو ته نه حاضرېدل. ځیني نور واړه خنډونه هم وو او شته، خو اصلي خنډونه همدا دوه دي. له حکومتي اړخ سره د طالبانو له خوا له خبرو انکار ډېر جدي نه و؛ ځکه چې یو ګډ پلاوي دا هر څه سموولی شوی، خو له بده مرغه د بندیانو نه خوشې کولو ستونزه اوږده کړه. حکومت د طالب بندیانو له خوشې کولو په بېلابېلو پلمو انکار کاوه، خو له امریکايي فشارونو وروسته حاضر شول چې نږدې څلور زره بندیان خوشي کړي. اوس ښايي پاتې زر نور بندیان هم خوشي کړي، خو وخت به اخلي. د بندیانو د خوشې کولو لپاره چې حکومت کوم شرطونه ایښي وو، هغه یو هم نه دی عملي شوی، خو حکومت بندیان خوشې کړل او نور به هم همداسې بې شرطه خوشي کوي. د بندیانو نه خوشي کول او پکې ځنډ د دې سبب شول چې د بین الافغاني خبرو پیل وځنډېږي. له همدې امله جګړې دوام وکړ چې پکې زرګونه نور افغانان ووژل شول. طالبان، امنیتي ځواکونه او ملکي وګړي ټول افغانان وو چې له بده مرغه قرباني شول او لا هم قرباني کېږي. اوس هېڅوک نشته چې د قربانیانو کورنیو ته ځواب ووايي او مسوولیت واخلي. حکومت ولې په پیل کې بندیان خوشې نه کړل؟ اوس یې ولې خوشې کوي؟ څه بدل شوي چې حکومت طالب بندیان خوشي کوي؟ که څه بدل شوي نه وي، نو بیا خو دا مانا لري چې حکومت ته د زرګونو افغانانو وینې مهمې نه وې او نه اوس مهمې دي.
له بله اړخه طالبانو هم د بندیانو خوشې کول دومره جدي نیولي چې د جګړې دوام ته یې لاره پرانیستې ده. د طالبانو بندیان به خوشي شي او باید ټول خوشي شي، خو پکار ده چې خبرې پیل شي. د خبرو پیل او بریا به د ټولو بندیانو خوشې کولو ته لاره هواره کړي. اوس د جګړې دوام که د څلور زرو بندیانو خوشې کولو ته لاره هواره کړه، خو د زرګونو طالبانو، امنیتي ځواکونو او ملکي وګړو د وژنې سبب هم شوه.
د جګړې دوام او د بین الافغاني خبرو په پیل کې خنډ نور په واضح ډول له ولس سره دښمني او د جګړې د دوام غوښتنه ده. له بده مرغه د واکمنو؛ پر ولس، امنیتي ځواکونو، طالبانو او عامو خلکو هېڅ زړه درد نه کوي. دوی ټول افغانان دي او باید وژغورل شي. هر څوک چې له دې ولس سره لږ هم مینه لري او زړه یې پرې دردېږي، باید شرطونه او دېوالونه ونړوي او بین الافغاني خبرې پیل کړي، څو هم روانې وژنې ودرېږي او هم یوې تلپاتې سولې ته لاره هواره شي.
