د ټاکنو کمېسیون وايي چې د ټاکنو ځانګړی تفتیش پای ته رسیږي او ورسره به دوی وروستۍ پایلې اعلانوي. د ټاکنو کمېسیون له خوا د رایو د تفتیش دا بهیر د ثبات او همپالنې ټیم بایکاټ کړی او په دې تړاو یې سخت ګواښونه کړي دي. د جنرال دوستم له خوا د موازي حکومت له ګواښ وروسته، اسلامي جمعیت او د کریم خلیلي په مشرۍ وحدت ګوند هم د موازي حکومت د جوړېدو ګواښ کړی دی. له دې سره پرون پر ټولنیزو رسنیو د ټاکنیزو کمېسیونونو د یو کمېشنر دین محمد عظیمي او د ټاکنو کمېسیون د دارالانشا د مشر حبیب الرحمن ننګ تر منځ د خبرو یو غږیز کلېپ هم خپور شوی، چې پکې ښاغلی ننګ د شکایتونو کمېسیون د پرېکړو پر تحریف او جعل کارۍ تورنیږي.
د ولسمشریزو ټاکنو پروسه له سره مسخره وه. لومړی خو ډېرو کمو کسانو پکې برخه واخیسته چې په هغو کې هم یوه لویه برخه جعل و. له هغه وروسته دا پروسه لانجمنه شوه، ټاکنو کمېسیون د ځانګړي ټاکنیز ټیم پر ملاتړ تورن شو. وروسته کیسه د ټاکنیزو شکایتونو کمېسیون ته ولاړه، هلته هم ستونزې او تورونه وو. اوس بیا د ټاکنو او ټاکنیزو شکایتونو کمېسیون تر منځ ستونزې دي او د ثبات او همپالنې ټیم یو مخ دا ټول کارونه پلان شوي ګڼي او تور لګوي چې په منظم ډول د قوانینو او کړنلارو خلاف کار روان دی چې یو څوک پر خلکو د ولسمشر په توګه وتپل شي.
تېرې ټاکنې له پراخ ولسي تحریم سره مخې شوې وې. ډېرو کمو کسانو پکې برخه واخیسته او پایله یې هم افغانستان او افغانانو ته په سرخوږي بدله شوې ده. اوس بیا د موازي حکومت د جوړولو ګواښونه کېږي چې دا بیا یو نوی سرخوږی دی. تېرې ټاکنې په هېڅ ډول مشروعیت نه لري. په څو دېرش میلیوني ولس کې څه ډول شونې ده چې یو څوک دې په نهه لکه رایو ولسمشر شي؟! دا د قانون، ولسواکۍ او ټاکنو مسخره کول دي. دا ټاکنې له سره مسخره او نامشروع وې او پایله به یې هم همداسې مسخره او نامشروع وي. لومړی خو داسې نه ښکاري چې دا ټاکنې به پایله ولري، که پایله یې معلومه هم شي، له یوه اړخه به د جعل پر اساس وي او له بله اړخه د کم ګډون له امله به هېڅ ډول مشروعیت ونه لري.
د ټاکنو لوبه باید نوره څنګ ته شي. تمرکز باید پر سوله وشي. پکار ده چې تېرې ټاکنې یو مخ باطلې اعلان شي. اوسنی حکومت که څه هم پوره نامشروع دی، باید تر هغو خپل کار ته دوام ورکړي چې په بین الافغاني خبرو کې پر یوه انتقالي یا بل حکومت موافقه کېږي. له همدې امله تېرې ټاکنې او پایله دې یې یو مخ لغوه شي او پر سوله دې تمرکز وشي. که د ټاکنو په پایله کې کوم حکومت را وهم وځي، د سولې لپاره موږ اړتیا لرو چې هغه حکومت لغوه کړو او پر ځای یې یو ناپېیلی انتقالي یا موقت حکومت جوړ کړو چې د سولې د هوکړو د پلي کولو عملي چارې پر مخ یوسي. له همدې امله نور باید د ټاکنو بد بویه او مسخره لوبه بنده شي او د افغانستان د خلکو پر اساسي غوښتنه او هیله چې هغه سوله ده، باید تمرکز وشي.
