پرون په کابل کې څو ښځو لاریون وکړ او د تعلیم، کار او ډوډۍ غوښتنه یې وکړه. لاریون کوونکو ادعا وکړه چې د امارت له خوا له تاوتریخوالي سره مخ شوي، هوايي ډزې شوې او ځیني لاریونوال ټپیان شوي هم دي. ټاکل شوې نن هم په کابل کې لاریون وشي او پر حکومت د نیوکو ترڅنګ ځیني غوښتنې هم وشي. په کابل کې تر اوسه شوي لاریونونه تر ډېره لانجمن وو او له غبرګون سره مخ شوي دي، خو ولې؟
هر څوک حق لري چې د خبرو، اعتراض او لاریون له لارې د حکومت ځیني کړنې نقد کړي، ویې غندي او یا هم له حکومت څخه غوښتنې وکړي. حکومتونه باید خلکو ته حق ورکړي چې د خبرو، اعتراض او لاریون له لارې خپل غږ پورته کړي. له دې سره دا هم مهمه ده چې اعتراض او لاریون باید د قوانینو او اصولو په چوکاټ کې وي. تر ګردو مهمه دا ده چې لاریون باید د مشروع غوښتنو لپاره وي او نیوکې باید د اصلاح او مثبت بدلون لپاره وي. ددې تر څنګ د قانون له مخې د لاریون لپاره باید له کورنیو چارو وزارت یا امنیه قوماندانۍ څخه اجازه واخیستل شي او یا هم هغوی مخکې له مخکې خبر کړل شي. د لاریون ځای، د ګډونوالو شمېر او نور اړوند مسایل باید مخکې له مخکې شریک شي. لاریون او اعتراض باید د نورو عامو خلکو ورځنی ژوند ګډوډ نه کړي او په داسې ځای کې وشي، چې نورو عامو خلکو ته ستونزې جوړې نه کړي. لاریونوال باید دا اصول مراعات کړي او اسلامي امارت هم باید په دې چوکاټ کې د اعتراضونو او لاریونونو مخه ونه نیسي او نه هم ورسره تاوتریخوالی وکړي.
د لاریون غلي کول او یا هم ورسره تاوتریخوالی کول، نظام ته د ګټې پر ځای زیان رسوي، ځکه چې که خلک د غږ پورته کولو حق ونه لري، نو بیا به پر نورو لارو فکر کوي چې هغه لارې نظام ته زیان رسوي. دا سمه ده چې ښايي د لاریونوالو ځیني غوښتنې ناسمې وي، خو له دې سره سره باید واورېدل شي. بله مسأله دا ده چې ځیني چارواکي شک لري چې لاریونوال به د بهرنیانو له لوري هڅول کېږي. که داسې څه وي، نو بیا لاره یوازې د لاریون مخنیوی نه دی، بلکې امارت باید د هغو اسنادو او شواهدو د موندلو هڅه وکړي چې دا ادعا ثابتوي. که دا ادعا ثابته شي، نو بیا حکومت حق لري چې هم د لاریون مخه ونیسي او هم یې تنظیموونکي تر عدلي تعقیب لاندې راولي، ځکه چې هېڅوک د بهرنیانو پر اشاره او لارښوونه د لاریون او اعتراض حق نه لري. ددې تر څنګ ځیني لاریونونه ددې لپاره کېږي چې ګډونوال یې په قصدي ډول ځان له تاوتریخوالي سره مخ کړي، څو بهر ته د وتلو لپاره خپل ځان ته دوسیه جوړه کړي. له دا ډول کسانو سره باید پوره احتیاط وشي او پرې نښودل شي چې خپلو موخو ته ورسېږي.
په پای کې ویلی شو چې انتقاد، اعتراض او لاریون د خلکو حق دی او امارت له خلکو دا حق نه شي اخیستلی، خو لاریونوال هم باید درک کړي چې انتقاد، اعتراض او لاریون د سمون او مثبت بدلون لپاره وي. په لاریون کې باید اصول او قوانین مراعات شي او داسې کار ونه شي چې قانون یې اجازه نه ورکوي. له همدې امله د قانون په چوکاټ کې لاریونونه او اعتراضونه د خلکو حق دی او حکومت ته هم ګټه رسوي او پکار ده چې دواړه اړخونه دا چاره درک کړي.
