خلیلزاد: تمه ده تر ولسمشرۍ ټاکنو مخکې سولې ته ورسېږو

د افغان سولې لپاره د امریکا ځانګړي استازي زلمي خلیلزاد نن په کابل کې خبریالانو سره په خبرو کې وویل، تمه شته چې تر ولسمشریزو ټاکنو مخکې سولې ته ورسېږي او طالبان باید له دې فرصته ګټه پورته کړي. هغه زیاته کړې طالبانو هم ورته ویلي چې دوی په دې باور دي چې له نظامي لارې نه شي بریالي کېدلی. خلیلزاد ویلي، طالبان ممکن د سولې د خبرو په پلاوي کې ځینې بدلونونه راولي او دی په احتیاط هیله من دی چې ژر په افغانستان کې د سولې هدف تر لاسه شي. په ورته وخت کې د ځینې راپورونو له مخې د طالبانو یوه پخواني چارواکي د نوم نه ښودو په شرط ویلي چې طالبان هم غواړي تر ولسمشریزو ټاکنو مخکې سوله وکړي او له مختلفو لارو پر افغان حکومت فشار راوړي څو موقت حکومت جوړېدو ته غاړه نرمه کړي. هغه دغه راز ویلي چې خلیلزاد له طالبانو سره په خبرو کې د اوربند وړاندیز کړی و، چې طالبانو رد کړ. د هغه په خبره طالبانو بیا وړاندیز کړی چې ځینې بندیان دې یې خوشې شي او دغه راز یې د خپلو مشرانو پر سفر د بندیزونه د لرې کېدو او له تور لیسته د هغوی د نومونو پر ایستل کېدو ټینګار کړی دی. دا په داسې حال کې ده چې پرون د سولې شورا مرستیال حاجي دین محمد وویل، ښایي ډېر ژر د سولې خبرو د پیل لپاره د ښه نیت په موخه ځینې طالب بندیان له زندانه ازاد شي.