د افغان جګړې په تړاو په امریکا کې نظر ورځ تر بلې منفي کېږي. امریکايي رسنۍ نږدې هره ورځ په افغانستان کې د امریکا د ماتې، زیاتو لګښتونو، مرګ ژوبلې او بې پایلې جګړې په اړه مطالب خپروي. تازه واشنګټن پوسټ افشا کړې چې سپینې ماڼۍ بیا بیا امریکايي ولس ته د افغان جګړې په تړاو ناسم معلومات ورکړي. په دې اړه دوه زره پاڼې اسناد هم د واشنګټن پوسټ لاس ته ورغلي چې امریکايي چارواکي یې لا زیات د افغانستان په تړاو تر فشار لاندې راوستلي دي. امریکايي رسنۍ بیا بیا دا وايي چې امریکا په افغانستان کې تر یو ټریلیون ډالر لګولي، ۲۳۰۰ سرتیري یې وژل شوي، لسګونه زره ټپیان دي او ځینې یې پر رواني ناروغیو اخته دي، خو د دې هر څه په بدل کې په افغانستان کې حالت نه یوازې د ښه کېدو لور ته نه ځي، بلکې طالبان پیاوړي شوي، لا زیاته ځمکه یې لاندې کړې ده، د امریکا په ملاتړ چلېدونکی حکومت کمزوری شوی، فساد زیات شوی، بشري حقونه تر پښو لاندې شوي او هېڅ داسې څه نشته چې امریکا یې نړۍ او امریکايي ولس ته د یوې لاسته راوړنې په توګه وړاندې کړي.
اوس له دغه حالت سره څه بدلېږي؟
په امریکا کې د افغان جګړې او په افغانستان کې د امریکا پر ښکېلتیا مطبوعاتي غوغا او وروستی فشار له دوو اړخونو ښکاري. لومړی دا چې امریکایي ولس ته د افغان جګړې په تړاو ډېر څه روښانه شوي. دوی اوس پوهېږي چې هلته هر څه ناسم روان دي، امریکايي ځواکونه خلک وژني او جنایتونه کوي. امریکا د فساد او ناقانونۍ ملاتړ کوي. د دوی له حضور سره په افغانستان کې نشه يي توکي، ترهګري او جګړې زیاتې شوې او امریکا هم په دې هېواد کې له خنډونو سره مخ ده. له همدې امله باید په افغانستان کې نظامي حضور او دغه ډول ښکېلتیا ختمه کړي. امریکايي ولس د همدې لپاره فشار راوړي، مطبوعاتي غوغا جوړه ده او دوی خپل حکومت اړ باسي چې بدلون راولي. دویم دا چې امریکايي تصمیم نیوونکې او اصلي کړۍ غواړي په افغانستان کې خپله تګلاره بدله کړي او د همدې لپاره دوی مطبوعاتي فشار او غوغا ته اړتیا لري. د دې لپاره چې دوی بدلون راولي، نو ځکه اړتیا لري چې دا هر څه د امریکايي ولس د غوښتنې پر اساس وښيي.
په هر حال، څه چې معلومېږي، هغه دا دي چې امریکا په افغانستان کې خپله تګلاره بدلوي. له طالبانو سره د جوړجاړي، د خپلو ځواکونو د ایستلو او یا هم کمولو او نورو بدلونونو له لارې غواړي په افغانستان کې خپله تګلاره بدله کړي. دا چې دا بدلون به څه ډول وي او امریکا به خپلې ګټې څنګه خوندي کوي، دا جلا بحث دی، خو اوس پکار ده چې افغانان د دې تګلارې له بدلون سره یو داسې بدلون ته لاره هواره کړي، چې دلته جګړه ختمه شي او سوله راشي. د دې لپاره لومړنی کار دا دی چې نور باید له افغانونو سره دښمني، کرکه او جګړه چې په هر نوم وي، ختمه شي. هغوی چې له امریکا سره په دوستۍ کې له خپلو خلکو سره په دښمنۍ کې وو، دا حالت باید نور ختم کړي او هغوی چې له امریکا او نورو سره نوي لینونه او اړیکې جوړوي، باید د خپل ورور د وهلو لپاره یې ونه کاروي. همدا وخت دی چې موږ ترې ګټه واخلو او افغانستان ته دایمي سوله را وګرځوو.
