د امریکايي الوتکې د لوېدو په پېښه کې ۱۱ بهرنیان وژل شوي دي

د بهرنيو رسنيو راپورونو له مخې امریکایي چارواکو منلې ده، چې یوه باروړونکې الوتکه یې په ننګرهار کې لوېدلې ده او په دې پېښه کې د پنځو امریکایي پوځيانو په ګډون ۱۱ کسه وژل شوي دي. دغه سي ۱۳۰ الوتکه په ننګرهار کې لوېدلې ده، خو وسله وال طالبان ادعا کوي چې ددوی له لوري په نښه شوې ده. اسوشټيډپرېس د طالب سرچینو له خولې لیکلي، چې دغه الوتکه د وسله والو طالبانو له لوري په نښه شوې ده او ګڼو کسانو ته پکې مرګ ژوبله اوښتې ده. امریکايي چارواکو بیا د طالبانو ددغه ادعا په اړه څه نه دي ویلي خو وايي چې په الوتکه کې ۱۱ کسه وژل شوي چې پنځه یې امریکايي عسکر او پاتې د الوتکې خدمه او پیلوټان دي.