د اکسوس خپرندویه ټولنې د خپل نشراتي فعالیت د دوولسمې کلیزې په مناسبت په کابل ښار کې د یو عصري او معیاري کتابتون نوې ودانۍ پرانیستله، چې دا ګام د هېواد په فرهنګي او علمي ډګر کې یو مهم پرمختګ بلل کېږي. د یادې ټولنې مسوولینو د پرانیستې په مراسمو کې وویل، چې دا کتابتون نه یوازې د کتابونو د پلور لپاره یو منظم او عصري ځای دی، بلکې موخه یې دا ده چې د مطالعې کلتور ته وده ورکړي او ځوان نسل له کتاب سره لا ډېر نږدې کړي.
دوی زیاته کړه چې د پرانیستې په ورځ سلګونه د کتاب مینهوال، محصلین، لیکوالان او فرهنګي شخصیتونه کتابتون ته ورغلي وو او له بېلابېلو برخو څخه یې کتابونه واخیستل. دوی همداراز وویل چې په دې کتابتون کې د بېلابېلو موضوعاتو لکه ادبیاتو، تاریخ، ټولنیزو علومو، اقتصاد، سیاست، او دیني علومو په ګډون سلګونه عنوانه کتابونه په منظم ډول ځای پر ځای شوي دي، څو هر لوستونکی وکولای شي د خپلې اړتیا وړ کتاب په اسانه پیدا کړي.
د کتاب پېرېدونکو له ډلې یو شمېر کسانو دا نوښت وستایه او ویې ویل، چې دا لومړی ځل دی چې په خصوصي سکتور کې د کتاب پلورنې لپاره داسې یو منظم، عصري او معیاري مرکز جوړېږي. د دوی په خبره، پخوا به د کتاب موندل ستونزمن وو او کتابونه به په بېلابېلو ځایونو کې خپاره پراته وو، خو اوس کولای شي په یو منظم چاپېریال کې خپلې خوښې کتابونه ومومي. یو بل ګډونوال وویل: “داسې ځایونه کولای شي ځوانان د ټولنیزو شبکو له بېګټې بوختیاوو راوباسي او مطالعې ته یې وهڅوي. دا یو ډېر مهم ګام دی چې باید نورې ادارې هم ورته پام وکړي.” فرهنګي کارپوهان باور لري چې د دې ډول کتابتونونو جوړېدل د مطالعې د کلتور د بیا ژوندي کېدو لپاره حیاتي ارزښت لري، په ځانګړې توګه په داسې وخت کې چې ډېری خلک له کتاب لوستنې څخه لیرې شوي دي.
د اکسوس خپرندویه ټولنې مسوولین وايي، چې په راتلونکي کې هم پلان لري چې د هېواد په نورو ښارونو کې ورته فرهنګي مرکزونه پرانیزي، څو کتاب ته د لاسرسي زمینه لا پراخه شي او د پوهې خپرېدو ته عملي ګامونه واخیستل شي. په ټوله کې، د دې عصري کتابتون پرانیسته د کابل ښار لپاره یو مثبت فرهنګي پرمختګ بلل کېږي، چې کولی شي د کتاب مینهوالو لپاره یو الهامبښونکی مرکز وګرځي او د مطالعې دود لا پیاوړی کړي.
