د بنګله دېش پخوانۍ لومړۍ وزیره خالده ضيا چې د دغه هېواد د حکومت د مخالف ګوند مشره هم ده، په اوو کلونو بند محکومه شوې ده.
د خالدې ضيا ګوند په بېړنۍ توګه د محکمې حکم رد کړی او اعلان یې کړی چې په ټول هېواد کې به اعتراضیه لاریونونه وکړي.
خالده ضیا ۷۳ کلنه ده، دا په ډهاکه کې محکمې ته نه وه حاضره شوې او د نوموړې مدافع وکيل هم دې غونډې ته حاضر نه شو او ویلي یې دي چې له محکمې د عدالت تمه نه لري.
د بنګله دېش سترې محکمې د مېرمن ضیا د استېناف هغه غوښتنه رد کړې چې اووه کاله وروسته له هغه وشوه چې په دغه هېواد کې د فساد پر وړاندې کمېسیون ته یې شکايت ثبت کړی و.
مېرمن ضیا د اداري فساد په یوه بله قضیه کې پنځه کلن بند تېروي او د روانې مياشتې په لومړيو کې د ناوړه روغتیایي وضیعت له کبله روغتون ته انتقال شوه.
د نوموړې ګوند ويلي چې د دغو قضيو تر شا یو لړ سياسي انګېزې شتون لري او دا د ډسمبر تر ټاکنو مخکې د حکومت هڅه ده چې مخالفین کمزوري کړي.
د نوموړې قاضي اخترالزمان ويلي چې مېرمن ضیا له ۲۰۰۱ ز نه تر ۲۰۰۶ ز کال پورې د خپل حکومت پر مهال له واکه په ناوړه ګټه اخیستنې د خپل مېړه ضياالرحمان په نوم خيريه مؤسسې ته له نامعلومو سرچينو درې لکه او ۷۵ زره ډالره تر لاسه کړي وو.
ضياالرحمان د بنګله دېش د پوځ پخوانی مشر او د دغه هېواد ولسمشر هم پاتې شوی چې په ۱۹۸۱ ز کال کې ووژل شو.
محکمې له دې قضيې سره په تړاو درې نور کسان هم په ۷ کلونو بند محکوم کړل.
مېرمن ضيا له ۳۰ نورو قضيو سره مخامخ ده چې د بنګله دېش په محکمو کې پرتې دي.
د نوموړې نشنلېست ګوند وايي، دا قضيې د ضیا پر وړاندې د اوسنۍ صدراعظمې شیخ حسینې له واکه ناوړه ګټه اخیستنه ده، ځکه دوی له ډېرې مودې راهيسې سياسي سیالانې دي او د دوی په وينا، شیخ حسینه غواړي چې په راتلونکو ټاکنو کې د درېيم ځل لپاره بريالۍ شي.
مېرمن ضيا او د دې سیاسي پلويانو د ۲۰۱۴ ز کال په ټاکنو کې ګډون ونه کړ او پر لاریونونو او اعتراضونو سربېره، شیخ حسینې ته لاره پرانيستل شوه چې یو ځل بيا واک ترلاسه کړي.
د مېرمن ضيا مهم پلوی ګوند جماعت اسلامي دی چې د شېخ حسینې سخت مخالف دی.
د دغه ګوند مشران په دې وروستيو کې له پاکستان سره د ۱۹۷۱ ز کال د ازادۍ د جګړې پر مهال د جنګي جرايمو په تور په اعدام محکوم شول.
