د اسلامي امارت رییس الوزرا؛ چارواکو ته امر کړی چې له دې وروسته په خپل سر له بهرنیو دیپلوماتانو سره نه شي کتلی. نوموړي ویلي چې له دې وروسته به دا لیدنې د بهرنیو چارو وزارت له خوا تنظمېږي. دا ګام له هغه وروسته پورته کېږي چې له چارواکو سره د پاکستان د سفیر پرله پسې کتنو د خلکو سخت غبرګونونه را وپارول. ویل کېدل چې د پاکستان سفیر په یوه اونۍ کې له شلو چارواکو سره کتلي وو، چې په ډېرو کتنو کې یې نه یوازې دیپلوماتیک اصول نه وو مراعات شوي، بلکې آن ځیني چارواکي د پاکستان سفارت ته ورغلي وو او هلته یې له سفیر سره کتلي وو.
د رییس الوزرا دا کار پر ځای او غوره کړنه ده، ځکه چې له یوه اړخه به له بهرنیو دیپلوماتانو سره په کتنو کې دیپلوماتیک اصول مراعات شي او له بله اړخه به پر چارواکو د بهرنیو دیپلوماتانو د نفوذ مخه تر ډېره ونیول شي. په څه ډول چې د پاکستان سفیر له چارواکو سره کتل، نه یوازې دیپلوماتیک اصول پکې نه مراعاتېدل، بلکې داسې ښودل کېده چې ګواکي د پاکستان سفیر په کابل کې یو با صلاحیته کس دی چې له هر چا سره کتلی شي، هغوی ته هدایات ورکولی شي او د یوه وایسرای په شان چلند کوي. ډېری کسانو خو د پاکستان سفیر د امریکا د سفیر په رول کې ګڼلی و چې په جمهوریت کې به یې وزیرانو ته دستور ورکاوه او څه به یې چې غوښتل، هغه یې کول. که څه هم هغه تر ډېره دا کار پټ کاوه، خو د پاکستان سفیر بیا ټولو ته داسې ښودله چې ګواکي په کابل کې اصلي واکمن دی او ټول چارواکي ورته غوږ ږدي. دغه حالت د اسلامي امارت خپلواکۍ او حیثیت ته زیان رساوه او په هېڅ ډول دغه لیدنې کتنې چې پکې د دیپلوماتیک اصول تر پښو لاندې کېدل د توجیه وړ نه وې.
بهرني دیپلوماتان حق لري چې د اړتیا پر مهال له بېلابېلو چارواکو سره وګوري، خو دا هر څه باید په یوه قانوني چوکاټ کې د بهرنیو چارو وزارت له لوري تنظیم شي. که کوم بهرنی دیپلومات له افغان چارواکي سره ګوري، نو باید موضوع او دا غوښتنه له بهرنیو چارو وزارت سره شریکه کړي. د بهرنیو چارو وزارت به اړتیا ته په پام سره دا لیدنه ددغه وزارت د تشریفاتو ریاست له لوري تنظیموي او ان ددغه ریاست یو استازی به هم په دغه لیدنه کې وي. که د دواړو لورو ترمنځ کوم توافق او یا تفاهم کېږي، هغه باید د بهرنیو چارو وزارت له لوري و ارزول شي او له هغه وروسته نهايي کېدلی شي.
په پایله کې ویلی شو چې د بهرنیو دیپلوماتانو د قانوني مهار کولو لپاره د رییس الوزرا وروستی ګام ډېر مهم دی چې هم د اسلامي امارت حیثیت خوندي کوي او هم پر چارواکو د بهرنیانو د نفوذ په مخنیوي کې اغېزناک پرېوځي. په دې ګام سره به د پاکستان د سفیر په ګډون نور دیپلوماتان هم درک کړي چې دوی د اصولو او قوانینو خلاف کارونه نه شي کولی او اړ دي چې دیپلوماتیک اصول مراعات کړي.
