د بښنې نړیوال سازمان: ایران ۳۰۴ لاریون کوونکي وژلي او زرګونه یې بندیان کړي

د بښنې نړیوال سازمان وايي ایراني حکومت لږ تر لږه ۳۰۴ لاریون کوونکي وژلي او زرګونه کسان یې نیولي دي. د بښنې نړیوال سازمان د ایران د لاریونونو په اړه یو اوږد او هر اړخیز راپور خپور کړی دی. دغه سازمان وايي د مرکو او پلټنو په پایله کې دا تاییدولی شي چې ایراني حکومت ۳۰۴ لاریون کوونکي په تېره نومبر میاشت کې وژلي او زرګونه کسان یې بندیان کړي دي. سرچینه کاږي چې په نیول شوو کسانو کې خبریالان، مدني فعالان، د بشري حقونو فعالین او عام وګړي شامل دي. د بښنې نړیوال سازمان په دغه راپور کې ایران د بشري حقونو په نقض تورنوي او وايي ایرانی حکومت هر هغه غږ چوپ کوي چې پر ضد یې راپورته شوی او یا د اصلاحاتو غوښتنه کوي. تر دې وړاندې ګڼو نورو نړیوالو بنسټونو هم د ایران دغه کړنه غندلې وه او دغه هېواد یې د بشري حقونو په نقض تورن کړی دی.