د جرمني او برېتانیې رسنیو په راپورونو کې ويلي، چې د هرمز تنګي د بندېدو له امله د انرژۍ داسې بحران رامنځته شوی، چې په تېرو ۵۰ کلونو کې يې ساري نه ليدل کېږي.
يادو رسنيو ويلي، د چين لوړپوړي رهبر يوه لسیزه وړاندې د انرژۍ مخ پر ودې ستراتیژيکه نقشه ټاکلې وه او اوس دغه هېواد د انرژۍ په نړيوال بحران کې تر ټولو لوی ګټونکی دی.
جرمن مګزين ډرسپغل مجلې په يوې لیکنې کې ويلي، د هرمز تنګي د بندېدو له امله د تېل لوی مصرف کوونکي او هم د خلیج د انرژۍ تولیدوونکي زیانمن شوي دي، خو چين بیا برعکس په دې کړکېچ کې ګټونکی دی؛ ځکه بېجینګ د داسې بحرانونو لپاره له ډېر مخکې چمتوالی و.
چين ډېر مخکې د څو میاشتو لپاره تېل او ګاز ذخیره کړي او بل دغه هېواد د نوې انرژۍ تجهیزاتو نړیوال تولید باندې هم تسلط لري.
چين د فوتوولټیک، بادي برېښنا، د انرژۍ ذخیره کولو بېټرۍ، برېښنایي موټر او د لوړ موثریت برېښنايي شبکې په نړیوال بازار کې د ۷۰ سلنې څخه تر ۸۵ سلنې پورې ونډه لري.
د برېتانيې رسنيو ويلي، چین د خپلې انرژۍ پالیسۍ په تنظیمولو کې ستراتیژیک لید ښودلی دی. د چین اصلي انګیزه “برېښنايي هېواد” او همدا یې د ملي امنیت ساتنه ده، چې هدف یې پر بهرنۍ انرژۍ تکیه نه کول او په ځانګړي ډول له بهرني سیاسي نفوذ څخه لرې کېدل دي.
