له نن څخه (۱۰۱) کاله وړاندې افغان ولس د غازي امان الله په مشرۍ له برېټانوي ښکېلاک څخه ازادي واخیسته. که څه هم برېټانوي ښکېلاک بیا بیا پر افغانستان یرغل وکړ، وژنې او وحشت یې وکړ، خو افغان ولس تسلیم نه شو، برېټانویانو ته یې سختې ماتې ورکړې او بالاخره هغوی اړ شول چې د افغانستان خپلواکي ومني. موږ هغه وخت خپلواکي واخیسته، خو د غازي امان الله خان ځینو تېروتنو او د انګریزانو دسیسو بله ستونزه جوړه کړه او زموږ خپلواکۍ په ښه ډول دوام ونه کړ. له تېرو څلورو لسیزو راهیسې موږ یو ځل بیا د بلواکۍ په اور کې سوځو او لا هم له دې حالت سره مخ یو.
موږ برېټانوي ښکېلاک مات کړ، موږ شوروي اشغالګر په ګونډو کړل، خو بیا هم د یوویشتمې پېړۍ له ښکېلاکي ځواک سره مخ ش,و. له تېرو شلو کلونو راهیسې بیا له امریکايي ښکېلاک سره مخ یو چې بڼه یې متفاوته ده. امریکايي ښکېلاک د سیمې هېوادونو په ځانګړي ډول د پاکستان په مرسته پر افغانستان یرغل وکړ او بیا یې د جګړې د دوام لپاره هم له پاکستان څخه کار واخیست. له همدې امله شل کاله بیا موږ په اور او جګړه کې را ګیر یو. زموږ کلي او کورنه بمباري شول، ممنوعه وسلې وکارول شوې، په ښارونو کې بریدونه وشول او له ځمکې او هوا د افغانستان انسان د وژنې هڅې روانې وې چې پکې سلګونه زره افغانان ووژل شول.
له اوږدو جګړو وروسته اوس یو ځل بیا یو چانس شته، د خپلواکۍ چانس او موږ باید خپله خپلواکي ترلاسه کړو. باید دا ځل له تاریخ څخه زده کړه وکړو او پرې نه ږدو چې دا لاسته راغلی چانس یو ځل بیا ضایع شي. اوس هغه وخت دی چې د نورو په لومو کې را ګیر شوي افغانان هم له دې چانس څخه استفاده وکړي، خپل ځان د نورو له منګولو لا خلاص کړي او په دې ډول د ځان او افغانستان له خپلواکۍ سره مرسته وکړي. موږ پوهېږو چې په کابل کې چارواکي خپلواک نه دي او آن د اسټرالیا په شان هېواد هم زموږ په چارو کې لاسوهنه کوي. موږ په دې هم پوهېږو چې طالبان خپل تړاوونه لري او همدغو تړاوونو ستونزې جوړې کړې دي. له همدې امله پکار ده چې دواړه لوري د ولس په مرسته د یو واحد او خپلواک دولت لپاره کار او هلې ځلې وکړي.
دا ځل د خپلواکۍ لپاره لاره د سولې لاره ده. په دې لاره کې افغانان باید یو بل ومني. اوس وخت دی چې پر بهرنیو تکیه ونه شي، د بهرنیو ځواکونو د پاتې کولو او جګړې هڅه ونه شي. اوس باید هر لوری د سولې په لوري ګامونه واخلي او سوله موږ واقعي خپلواکۍ ته رسولی شي. که څوک اوس هم ستونزې جوړوي، د جګړې دوام ته لاره پرانیږي او نه پرېږدي چې بین الافغاني خبرې پیل او بریالۍ شي، نو دوی د خپلواکۍ دښمنان او د نورو مزدوران دي. د امان الله خان رښتیني لارویان، د خپلواکۍ مینه وال او رښتیني افغانان هغه دي چې د افغانانو ترمنځ جوړجاړی او د پردیو وتل غواړي او د همدې لپاره هڅه او مبارزه کوي. په سوله او یو ټغر را ټولېدل او د بهرنیو له حضور څخه د افغانستان پاکول د خپلواکۍ یوازینۍ او کارنده لاره ده.
