د ارګ هڅې لا هم روانې دي چې د دولت عالي شورا جوړښت او غړي نهايي کړي، خو ښکاري چې سر له اوسه په دې تړاو د حکومت او سیاستوالو ترمنځ ژور اختلاف دی او دا به سخته وي چې دا شورا داسې جوړه شي، چې ټول پرې توافق ولري او نوي اختلافات دې ونه زېږوي. که څه هم په ارګ کې سرچینې وايي چې په دې اړه کارونه وروستۍ مرحلې ته رسېدلي، خو واقعیت دا دی چې یا به دا کار ځنډېږي او یا به یې هم اعلان له دولت سره نوي مخالفتونه را ولاړوي.
د دولت عالي شورا د ډاکټر عبدالله او اشرف غني ترمنځ له ټاکنیزو لانجو وروسته د هغه توافق برخه وه چې پر اساس یې واک د دواړو ټیمونو ترمنځ ووېشل شو. د دولت عالي شورا به په لویو مسایلو کې نه یوازې ولسمشر ته مشورې ورکوي، بلکې ولسمشر هم اړ دی چې مهمې او لویې پرېکړې د دې شورا د مشورې پر اساس وکړي. ځیني خوا وايي چې دا شورا به په لویو مسایلو کې د تصمیم نیونې اصلي مرجع هم وي.
که څه هم دا شورا باید ډېره مخکې جوړه شوې وای، خو ارګ فکر کاوه چې دا شورا به یې صلاحیتونه را کم کړي او بیا به په چارو کې خلاص لاس ونه لري، ځکه یې تر اوسه د دې شورا جوړېدل ځنډولي وو. له بله اړخه ارګ هڅه کوله چې له سیاستوالو او مخورو کسانو سره جلا جلا معاملې وکړي او په دې ډول د هغوی ملاتړ را خپل کړي. د دې تر څنګ ارګ ځان پیاوړی ګاڼه او فکر یې کاوه چې دوی د بهرنیانو په مرسته هر څه مخ ته وړلی شي او په کور دننه اجماع یا د سیاستوالو ملاتړ ته اړتیا نشته، خو له طالبانو سره د امریکا هوکړې او د بهرنیو ځواکونو وتلو حالت بدل کړ. پر حکومت پرله پسې فشارونه راغلل او آن بهرنۍ سیاسي، اقتصادي او نظامي مرستې ورسره کمې شوې. د دې تر څنګ پر ارګ فشار و چې د سولې په چاره کې نه یوازې چټک او لوی ګامونه واخلي، بلکې په دې تړاو په ګور دننه هم اجماع رامنځ ته کړي. که څه هم ارګ د اجماع لپاره ځیني هڅې او معاملې وکړې، خو بیا هم ونه توانېدل چې اجماع رامنځ ته کړي. له همدې امله بېرته اړ شول چې د دولت عالي شورا جوړه کړي.
اوس چې د دولت عالي شورا جوړیږي، نو اجماع په رامنځ ته شي؟
داسې نه ښکاریږي چې د دولت عالي شورا به د اجماع سبب شي، ځکه چې د دې شورا د غړو په اړه توافق نشته. ډېر کسان شته چې ځان د دې شورا د غړیتوب مستحق ګڼي، خو دا ممکنه ده چې دا ټول دې په یوه شورا کې را ټول شي. د بېلګې په ډول یوازې جمعیت اسلامي تر لسو ډېر داسې کسان لري، چې هر یو یې ځان د دې شورا لپاره وړ ګڼي او که غړیتوب ور نه کړل شي، مخالفت به کوي. له بله اړخه د دې شورا د غړیتوب لپاره د ټاکل کېدو میکانېزم داسې دی چې شته اختلافونه نه شي حل کولی. له همدې امله که دا شورا اعلان هم شي، اختلافونه به ورسره لا زیات شي او حکومت به ونه توانېږي چې د دې شورا پر مټ سیاسي اجماع رامنځ ته کړي او د سولې او جګړې په برخه کې شته ګواښونه دې مدیریت کړلی شي.
