د غور ولایت د پسابند ولسوالۍ یوشمېر اوسېدونکي ادعا کوي چې د دې ولسوالۍ پر مواصلاتي لارو د طالبانو د ماین کارۍ له امله خلک په بد اقتصادي وضعیت کې ژوند کوي.
دوی وايي، امنیتي ځواکونو هم د یادې ستونزې د حل او له لارو د ماینونو د ایستلو لپاره تر اوسه کوم اقدام نه دی کړی.
د دې ولسوالۍ یوشمېر اوسېدونکو پژواک ته ویلي، پسابند تر اقتصادي کلابندۍ لاندې ده او ځينې خوراکي توکي په بازار کې نه پیدا کېږي.
د دې ولسوالۍ اوسېدونکو دغه راز ويلي، اوس تر اقتصادي کلابندۍ لاندې دي او همدا اوس وریجې، غوړي او نور خوراکي توکي په بازار کې نه پیدا کېږي او د یو لېتر پټرولو بیه ۱۳۰ افغانيو ته رسېدلې ده.
د دې ولسوالۍ یوه اوسېدونکي عبدالاحد پژواک ته ویلي: «زموږ په بازار کې وریجې، اوړه، غوړي او نور خوراکي او اړین توکي چې د یو کور اړتیا پوره کړي، ډېر په سختۍ پیدا کېږي. دا چې طالبانو په لارو کې ماینونه ځای پر ځای کړي، نو ځکه دوکانداران څه نه شي راوړلای.»
نوموړي زیاته کړه، همدا اوس د یو لېتر پټرولو بیه ۱۳۰ افغانۍ ده او خلک یې د اخیستو توان نه لري.
بلخوا د غور د والي ویاند عبدالحي خطیبي د یادې پېښې په تایید سره ویلي، په پسابند ولسوالۍ کې د زیاتو وسله والو طالبانو شتون د یادو ستونزو لامل شوی او دغه ولسوالي یې تر «سختې اقتصادي» محاصرې لاندې کړې.
د غور د ولایتي شورا غړی عبدالبصير قادري وايي، له تېرو اتو میاشتو راهیسې طالبانو دې ولسوالۍ ته د بار وړونکو موټرو پر راتلو بندیز لګولی او د دې ولسوالۍ اوسېدونکي له سختو ستونزو سره مخ دي.
نوموړي له حکومته وغوښتل چې یادې ولسوالۍ ته د امکاناتو رسولو او د اقتصادي کلابندۍ د له منځه وړلو لپاره بېړنی اقدام وکړي.
هغه زیاته کړه: «په پسابند ولسوالۍ کې اقتصادي وضعیت دومره خراب دی چې خلک لومړنیو خوراکي توکو ته لاسرسی نه لري».
د هغه په خبره، که حکومت د یادې ستونزې د حل لپاره اقدام ونه کړي، د خلکو ستونزې به له دې نورې هم زیاتې شي.
د پسابند ولسوالي د افغانستان په سوېل کې له هلمند ولایت سره ګډه پوله لري چې تل په کې د امنیتي ځواکونو او طالبانو ترمنځ سختې جګړې رامنځته کېږي.
