د پکتيکا په مرکز ښرنه کې د دغه ولايت د ګومل ولسوالۍ اوسېدونکو د افغان او بهرنيو ځواکونو په ګډو عملياتو کې د ملکي وګړو د وژل کېدو پر غبرګون لاریون وکړ.
دغه لاريون د ګډو ځواکونو د هغو عملیاتو په غبرګون کې شوی چې له امله یې څو ورځې وړاندې په ګومل ولسوالۍ کې اووه بې ګناه عام وګړي ووژل شول او د ښځو او ماشومانو په ګډون پنځه کسان ټپیان شول.
د بنګل په نوم يوه لاريون کوونکي پژواک ته ويلي چې په دغو عملیاتو کې د بې ګناه وګړو د وژل کېدو ترڅنګ څو کورونه هم ويجاړ شوي او یوشمېر موټرسایکلونه له منځه تللي دي.
دوی له دولته غوښتي چې د دې پېښې عاملین دې ونيسي او د قانون منګلو ته یې دې وسپاري.
دوی چې (مرګ پر امریکا) شعارونه یې ورکول ادعا کوله چې امریکایانو په افغانستان کې د سولې مخه ډب کړې او نه غواړي چې په هېواد کې سوله رامنځته شي.
د ادم خان په نوم يوه بل لاريون کوونکي ويلي چې په يادو عملياتو کې ټول وژل شوي ملکي وګړي وو او که چېرې د دوی غږ وا نه ورېدل شي، نو په پراخو لاریونونو به لاس پورې کړي.
په دې وروستیو کې د ګډو ځواکونو په عملیاتو کې زیاتوالی راغلی چې تر ډېره پکې ملکي وګړي په نښه شوي او دوی ته یې مرګ ژوبله اړولې.
د پکتیکا تر پېښې څو ورځې مخکې په پکتيا، هلمند، لوګر، ننګرهار او میدان وردګ ولايتونو کې د ګډو ځواکونو په عملیاتو کې ملکي وګړو ته مرګ ژوبله اوښتې.
بلخوا د امریکا پوځ تازه اعلان کړی چې روان کال یې په افغانستان کې پر طالبانو او نورو ترهګرو ډلو تر ۶ زرو ډېر بمونه غورځولي دي چې دا په تېرو لسو کلونو کې تر ټولو لوړ شمېر دی. امریکا چې په افغانستان کې د هوایي بریدونو لپاره، ایف ۱۶، ای سي ۱۳۰ الوتکې او دغه راز بېلابېل توغندوي کاروي، ډېری وخت یې له امله ملکي وګړي په نښه کېږي او د امریکا دې کار د ملکي افغانانو توند غبرګونونه راپارولي دي. په تېره یوه اونۍ کې په هلمند کې پر ملکیانو هوایي بریدونو په لسګونه ولسي وګړي ووژل او لسګونه نور یې ټپیان کړل.
د ملي وحدت حکومت مشران هم د ملکي وګړو د وژنې په اړه غلي دي چې د خلکو له نفرت سره مخ شوي دي.
