د چين د هانکانګ ځانګړې اداري سيمې حکومت د سپتمبر په ۱۶مه نېټه د خپل اقتصادي او ټولنيز پرمختګ لومړی پنځه کلن پلان (۲۰۲۶-۲۰۳۰م کال) رسماً خپور کړ. په لومړي ځل يې د دغې ځانګړې اداري سيمې د اقتصادي او ټولنيزو چارو بشپړ لوړ پوړی ډيزاين کړی او په راتلونکو پنځو کلونو حتی لا اوږده موده کې يې د هانکانګ پرمختيايي موخې، عمده تګلارې او د تطبيق لارې روښانه کړې دي. دغه پلان ”د يو هېواد او دوو نظامونو“ د تطبيق لپاره تاريخي اهميت لري.
مشخصو معلوماتو ته په کتو، دغه پنځه کلن پلان له ۷ برخو څخه جوړېږي او پکې ۵ عمده موخې ټاکل شوې دي: د اقتصادي چارو نوي پرمختګونه، د نړيوالې رقابتي وړتيا او اغېزې پر له پسې پياوړتيا، د سيمې په شمالي برخه کې د اباديزو چارو چټکتيا، د خلکو ژوند څرګند ښه والی او د هېواد په عمومي پرمختيايي پلان کې د هانکانګ ښکېلتيا او خدمتونه. د دې تر څنګ د هانکانګ په لومړي پنځه کلن پلان کې ”د هېواد د غوښتنو او د هانکانګ د ښېګڼو“ له مخې د” څلورو مرکزونو او یو لوړ ځای“ پر جوړېدو ټينګار شوی او ګڼ اجباري او متوقع شاخصونه پکې ټاکل شوي دي.
د هانکانګ د ځانګړې اداري سيمې اجرائيه رئيس لي جيا چاو په دې اړه ويلي، دغه پنځه کلن پلان د هانکانګ او هېواد د پرمختيايي ستراتيژيو د نښلولو او د هېواد په عمومي پرمختيايي پلان کې د هانکانګ د ښې ښکېلتيا او خدمت کولو په پار ټاکل شوی او له ثباته تر سوکالۍ د هانکانګ د باکيفيته پرمختګ په موخه د مختلفو ټولنو او ډلو د ګډو هڅو عملياتي نقشه هم بلل کېږي. د هانکانګ «وېن وې پو» ورځپانې دا نظر لري، پنځه کلن پلان د هانکانګ د مختلفو ټولنو پرمختګ ته څرګند لوری اشاره کړی څو ښاريان له پرمختيايي لاسته راوړنو څخه برخمنېدای او هره کورنۍ پر راتلونکي لا زياتې ښکلې هيلې او باور درلودلی شي.
اوس مهال هانکانګ د خپلو سياسي او اقتصادي چارو په تر ټولو ښه موده کې دی. په ۲۰۲۵ کال کې د هانکانګ د اقتصادي ازادۍ کچې او د سهامي پانګونو راجلبوونکې اندازې يې دواړو د نړۍ لومړی ځای نيولی دی. دغه راز په همدې کال کې هانکانګ ته د تلونکو سيلانيانو شمېر ۴۹.۹ ميليونو ته رسېدلی چې ۱۲سلنه زياتوالی ښيي.
په داسې حال کې د هانکانګ لومړی پنځه کلن پلان څنګه خاص ارزښت لري؟
روان کال د چين د ۱۵م پنځه کلن پلان پيلېږي او د هانکانګ پر وړاندې ستر پرمختيايي فرصتونه موجود دي. که هانکانګ پخپله د هېواد له ۱۵م پنځه کلن پلان سره خپل پرمختيايي پلان ونښلوي، د هېواد په پرمختيايي حالت او نړيواله سيالي کې خپل مناسب ځای په اسانه او دقيقه توګه موندلی شي او لا پراخه پرمختيايي فضا به وګټي.
هانکانګ به د خپل لومړي پنځه کلن پلان په پيلېدو سره د عامې ادارې داسې مرحلې ته ننوزي چې د عمومي پاليسيو جوړولو او دقيق تطبيق ته به لا زيات ارزښت ورکړي. هانکانګ کې د چيني واردوونکو او صادروونکو ټولنې د بورډ مشر او د دغې ځانګړې اداري سيمې د تقنيني شورا غړي جونګ چي فنګ ويلي، د دغه پنځه کلن پلان په ټاکلو سره د هانکانګ تصدۍ کولی شي په پانګونې، د پلان په جوړولو او د چارو په بدلولو کې لا روښانه ليدلوری ولري څو د صادراتو، وارداتو او مسلکي خدماتو په شمول د هانکانګ چارې د هېواد دننه او بهر دوو دورانونو کې ښه ښکېل شي.
راتلونکي پنځه کاله نه يوازې په چين کې د سوسياليستي عصري کېدو د نسبتاً جوړېدو لپاره د بنسټ اېښودلو او پوره هڅونې مهمه مرحله بلل کېږي، بلکې د هانکانګ ځانګړې اداري سيمې د لوړ کيفيت پرمختګ طلايي موده به هم وي. تمه دا ده چې هانکانګ د لومړي پنځه کلن پلان په لارښوونې ”د هېواد په اتکا، له نړۍ سره د نښلولو“ ځانګړې برتري پوره وکاروي، پر پرمختيايي چارو تمرکز ولري، د خلکو ژوند په ښه والي کې لا زيات کارونه وکړي، له ثباته تر سوکالۍ د نوي مزل نوې پاڼه پرانيزي او د” يو هېواد او دوو نظامونو“ سيستم غوره والی او فعاليت لا نور هم څرګند کړي.
