د ولسمشر لومړي مرستیال امرالله صالح ویلي چې طالبانو د یوې باریکې لارې په جوړولو پرمختګ کړی دی او په وینا یې دغې ډلې ته به نیول شوې سیمې په هدیره بدلې شي. نوموړي پر خپله فیسبوک پاڼه لیکلي، ځینې سیمې چې طالبان د سقوط نوم ورکوي، د یوې باریکې لارې په جوړولو پرمختګ دی او هغه څوک چې له طالبانو سره په جګړه کې بلد دي، پوهېږي چې یادې سیمې به د طالبانو لپاره په ګور بدلې شي.
امرالله صالح دا څرګندونې په وروستیو کې د ولسوالیو د پرلهپسې سقوط په تړاو پر حکومت انتقادونو ته په ځواب کې کوي. په تېره نږدې یوه نیمه میاشت کې طالبانو تر دېرشو پورې ولسوالۍ نیولې دي، چې حکومت یې تکتیکي په شاتګ ګڼي. په دغو ولسوالیو کې سلګونه امنیتي ځواکونه طالبانو ته یا مخامخ او یا هم د سیمهییزو مشرانو په منځګړیتوب تسلیم شوي چې بیا وروسته هغوی خوشې کړي دي. په ډېرو ولسوالیو کې امنیتي ځواکونو ته درنه مرګژوبله هم اوښتې او تر څنګ یې طالبانو ته درنې او سپکې وسلې، تجهیزات، هاموې ټانګونه او رنجر هم لاسته ورغلي دي.
د ولسوالیو دغه سقوط بې ساری دی او له همدې امله شور او زوږ جوړ شوی دی. دا چې «د یوې باریکې لارې په جوړولو پرمختګ کول» څه مانا لري، ښايي یوازې امرالله صالح او څه نور ملګري یې پرې پوه شي؛ خو خلک ویني چې رښتیا هم طالبانو ولسوالۍ نیولې دي او دا لړۍ لا هم روانه ده. دا ولسوالۍ په ټول افغانستان کې دي او ان د کابل په دروازه کې دوې ولسوالۍ (نرخ او جلریز) هم طالبانو نیولې دي. خلک دې ته نه ګوري چې دا په باریکه لاره پرمختګ دی او که په پلنه لاره، بلکې خلک نتیجې ته ګوري او په نتیجه کې ویني چې ولسوالۍ سقوط کېږي، امنیتي ځواکونه یا سیمه پرېږدي، یا تسلیمېږي او یا هم مرګ ژوبله ور اوړي، وسلې، تجهیزات او سیمې د طالبانو لاس ته لوېږي، نو ځکه غږ پورته کوي، ځینې یې اندېښنه ښيي او ځینې یې پر حکومت توندې او سختې نیوکې کوي.
تر اوسه پورې دا ولسوالۍ لویه برخه لا هم له طالبانو سره دي او بېرته نه دي نیول شوې. دا چې امرالله صالح وايي چې دا سیمې به د طالبانو په هدیره بدلې شي، بیا هم ستونزه نه حل کېږي. لومړی خو داسې نه ښکاري چې دا ولسوالۍ به ټولې بېرته دولت ونیسي، خو که دا کار وشي، بیا یې هم مانا دا نه ده چې هېڅ ستونزې نه دي پېښې شوې. که بیا هم ونیول شي، نه به د سقوط پر مهال د سرتېرو پراخه مرګژوبله جبران کړي او نه به هم حکومت ته بېرته هغه وسلې او تجهیزات په لاس ورشي چې د طالبانو لاس ته لوېدلي دي.
پر دې بنسټ امرالله صالح چې څه وايي یوازې انتقادونو ته یو بې ګټې ځواب دی، چې نه ستونزه حل کولی شي، نه د ولسوالیو سقوط توجیه کولی شي، نه اوښتي زیانونه جبرانولی شي او نه هم د هغه ګواښ مخنیوی کولی شي چې له دې امله رامنځ ته شوی دی.
