د ټاکنيزو شکايتونو خپلواک کمېسيون وايي، د ولسي جرګې د تېرو ټاکنو په تړاو د راټولو شويو شکایتونو د څېړنو پايلې ښايي په ځنډ سره خپرې شي. د دغه کمېسيون چارواکي وايي چې د ترلاسه کړو ۱۲ زرو شکايتونو څخه يې تر دې مهاله ۱۱زره شکايتونه څېړلي دي.
د ټاکنيزو شکايتونو د کمېسيون غړی او وياند علي رضا روحاني وايي چې د مهالوېش له مخې يوازې يوه اونۍ نور وخت لري چې د ټاکنيزو جرایمو او شکایتونو اړوند لومړنۍ پايلې خپرې کړي، خو په وينا يې چې د ټاکنو کمېسيون په کارونو کې ځنډ او د ځينو رايو بيا شمېرنه ښايي د دې سبب شي چې د شکايتونو د پايلو اعلان هم وځنډېږي.
د ټاکنيزو شکايتونو کمېسيون تر دې وړاندې ويلي وو، له ځينو مرکزونو يې دومره شکايتونه راټول کړي چې د روڼتيا د ټينګښت لپاره ښايي د يادو مرکزونو ټولې رايې باطلې کړي.
د ټاکنو د خپلواک کمېسیون د ویاند مرستیال ذبیح الله سادات د ټاکنيزو شکايتونو کمېسيون د نيوکې په ځواب کې وايي: «کمېسیون پر دې کار کوي چې د ليندۍ په دويمه لومړنۍ او په لسمه وروستۍ پايلې اعلان کړي، موږ هڅه کوو چې حق حقدار ته ورسوو، سمه پلټنه وشي چې له دې امله دا کار وخت غواړي، مونږ تل د شکایتونو له کمېسیون سره همکار یو، خو هڅه کوو چې دقت د سرعت قرباني نه شي».
د ټاکنو یو شمېر څارونکي وايي، د دواړو کمېسیونونو په کار کې ځنډ به د دې سبب شي چې ان راتلونکې ولسمشريزې ټاکنې له ځنډ سره مخ شي.
د فيفا اجرايوي رييس یوسف رشید وايي چې د کمېسيونونو په کارونو کې ځنډ به د خلکو باور هم زيانمن کړي.
خو د ټاکنو کمېسیون د ویاند مرستیال ذبیح الله سادات وايي چې د ټاکنو پايلې په خپل وخت اعلانوي او د شکایتونو د څېړنې لپاره هم ټول مواد د شکایتونو کمېسیون ته پر خپل وخت ورکوي.
