د ټاکنیزو شکایتونو کمېسیون وايي چې له وخته مخکې د ټاکنیزو کمپاینونو ۱۳۳ موارده ورسره ثبت شوي او له دې شمېر څخه ۸۹ ته یې رسیده ګي شوې ده.
د دغه کمېسیون منشي او ویاند علي رضا روحاني وړمه ورځ په یوه خبري ناسته کې وویل، تر اوسه له وخته مخکې د ټاکنیزو کمپاینونو ۱۳۳ موارده له دوی سره ثبت شوي دي. نوموړي زیاته کړه: «تر اوسه هغه موارد چې له وخته مخکې انتخاباتي کمپاین پورې اړه لري، ۱۳۳ موارد یې د انتخاباتي شکایتونو کمېسیون کې ثبت شوي، ۸۹ مواردو ته رسیدهګي شوې، ۱۲ موارده تر څېړنې لاندې دي او ۱۲ نور یې د رسنیو کمېټې ته لېږل شوي، ځکه رسنیزې سرغړونې بلل شوې دي.»
له اجازې پرته په کورونو، ټرافيکې نښو د پوسټرونو نصبول، له بهرنيو بنسټونو یا اتباعو څخه د کمپاین لپاره پیسې اخیستل، له دولتي امکاناتو ګټه اخیستل، په کمپاینونو کې د عامه نظم اخلال او بېلابېل نور موارد جدي ټاکنیزې سرغړونې بلل کېږي، چې د کمېسیون د چارواکو په وینا سرغړونکي به یې له پنځو زرو نیولې تر پنځوسو زرو افغانیو پورې نغدي جریمه شي.
د ټاکنو د شکایتونو کمېسیون وايي چې هېڅ دولتي مامور په ځانګړي ډول امنیتي مسوولین نه شي کولای چې په ټاکنیزو سیالیو کې ګډون وکړي.
په ورته وخت کې د افغانستان د ازادو او عادلانه ټاکنو بنسټ یا فیفا وايي چې ټاکنیزو کمېسیونونو کاندیدانو ته د کمپاین په اړه اړین عامه پوهاوی نه دی ورکړل شوی، ځکه په ټاکنیزو کمپاینونو کې سرغړونې تر سترګو کېږي. د دغه بنسټ اجرایوي رییس یوسف رشید ازادي راډيو ته ویلي: «که نن سبا په کمپاینونو کې سرغړونې ترسترګو کېږي، لامل یې دا دی چې څه ډول لازمه وه، کاندیدانو ته د کمپاین په اړه عامه پوهاوی نه دی ورکړل شوی، د کمپاین پر مهال له مقراراتو او طرزالعملونو سرغړونه کاندیدانو ته یوه ننګونه ده.»
