د طالبانو او امریکايي استازو ترمنځ په شوو خبرو کې له افغانستان څخه د امریکايي او نورو بهرنیو ځواکونو وتل اساسي خبره ده. که څه هم څوک دقیق نه پوهېږي چې په څومره وخت کې د امریکايي ځواکونو پر وتلو موافقه شوې ده، خو ویل کېږي چې د شوې هوکړه له مخې به په ۱۸ میاشتو کې بهرني ځواکونه له افغانستان څخه وځي. امریکا او طالبانو تر اوسه په دې اړه وروستۍ هوکړه او لاسلیک نه دي کړي، خو خلیلزاد په امریکا کې دی او هلته اوس دا په سیاسي کړیو کې یو مهم او اساسي بحث دی.
ځینې سیاستوال، سناتوران او په ځانګړي ډول نظامي جنرالان ټینګار کوي چې له افغانستان څخه د امریکايي ځواکونو وتل به خطرناکې پایلې ولري او له همدې امله ټینګار کوي چې باید یوه برخه ځواکونه په افغانستان کې پاتې شي. دوی وايي چې که امریکايي ځواکونه په افغانستان کې پاتې نه شي، نو ښايي افغانستان بیا د امریکا له دښمنانو ډک شي او پر امریکا برید وکړي. په امریکا کې دا بحث لا هم شته چې طالب د باور وړ ځواک نه دی او هر وخت له خپلې خبرې ګرځېدلی شي. دوی دغه راز وايي چې په سیمه کې د امریکايي ګټو لپاره هم اړتیا ده چې امریکا په افغانستان کې خپل ځواکونه پرېږدي. له بله اړخه د امریکايي ځواکونو وتلو او ساتلو ته د ماتې او بریا له زاویې هم کتل کېږي. امریکايي نظامیان او هغوی چې د امریکا پر نظامي حیثیت ټینګار کوي، له افغانستان څخه د ځواکونو وتل د امریکا یو ډول نظامي ماتې ګڼي. دوی استدلال کوي چې د ځواکونو په وتلو سره دا پیغام ورکول کېږي چې امریکايي نظامیان په افغانستان کې مات شول او مجبور شول چې په پای کې پرته له لاسته راوړنې ووځي. له همدې امله دوی دې داسې سیاسي معاملې پلویان دي، چې ورسره سم په افغانستان کې د امریکا ځواکونه پاتې شي.
اوس د امریکا په سیاسي کړیو کې دا بحث ګرم دی او تر هغو چې په دې اړه وروستۍ هوکړه کېږي، دا بحث به لا هم روان وي. که امریکا ونه غواړي چې خپل ځواکونه وباسي، بیا د دې مانا دا ده چې دوی سیاسي جوړجاړی نه غواړي، ځکه سیاسي جوړجاړی د ځواکونو له وتلو سره تړلی دی. د وسله والو طالبانو لومړنۍ خبره دا ده چې د سولې لپاره باید بهرني ځواکونه له افغانستان څخه ووځي. دوی په دې خبره کې جدي دي او اوس یې دا دریځ سیمه ییز او لوی قدرتونه هم خوښوي او ملاتړ یې کوي. همدا چاره امریکا مجبوروي چې دا غوښتنه ومني او د زهرو دا کوټ وڅښي. دا د امریکا لپاره یو مجبوریت دی، نه یو انتخاب.
څه چې زموږ افغانانو لپاره مهم دي، هغه دا دي چې د امریکايي ځواکونو وتل له سولې سره پوره غوټه شي. همدا چې امریکايي ځواکونه وځي، ورسره سمه باید سوله راشي. داسې نه چې امریکايي ځواکونه وځي، خو موږ بلې جګړې ته ځو. یا د امریکايي ځواکونو د وتلو څرنګوالی داسې شي چې موږ له یوې جګړې بلې ته ولاړ شو. له همدې امله امریکايي ځواکونه باید ووځي، خو ورسره باید داسې ګامونه واخیستل شي چې سوله تضمین شي.
