د چين اتم نړيوال وارداتي نندارتون د نومبر په لسمه نېټه په شانګهای کې پای ته ورسېد، چې پکې ګڼو تصديو خپل تولیدات نندارې ته وړاندې کړي وو.
د امريکا د تاپيستري ګروپ عمومي مدير ساند سيس د چين نړيوال وارداتي نندارتون د توليداتو د ښودلو او د نويو نوښتونو او فکرونو ښه ډګر بللی دی او په خبره یې، شرکت يې په راتلونکي ۹ م نندراتون کې د ګډون غوښتنلیک هم وړاندې کړی دی.
په چين کې د استرازنيکا شرکت (AstraZeneca) عمومي مدير لين شياو رسنيو ته ويلي، چې د چين نړيوال وارداتي نندارتون په دغه هېواد کې د پانګونې او د چيني پرمختګ د ګټو د شريکولو لپاره بې ساری ډګر برابر کړی دی.
شمېرې ښيي، د چين اتم نړيوال وارداتي نندارتون ګڼې لاسته راوړنې لري او د قراردادونو ارزښت يې ۸۳ ميليارډه او ۴۹۰ مليونه امريکايي ډالرو ته رسېدلی، چې دغه شمېر د تېرې دورې نندارتون په پرتله په سلو کې څلور اعشاريه څلور زياتوالی ښيي او نوی ريکاډ يې جوړ کړی دی. د دې ترڅنګ په سږني نندارتون کې د ګډونوالو تصديو شمېر د تېر کال په پرتله څه باندې شپږ زيات شوی او د نړۍ له پنځه سوو لویو او سترو تصديو او شرکتونو څخه ۲۹۰ يې پکې ګډون کړی و او د نندارخونې پراخوالی او د ګډون کوونکو تصديو عمومي شمېر يې نوي ريکارډونه جوړ کړي دي.
په سږني نندارتون کې څلور سوه او يو شپېته نوي توليدات، تخنيکونه او خدمتونه په لومړي ځل نندارچيانو ته وړاندې شوي او د دې ترڅنګ د لږ پرمختلليو هېوادونو د توليداتو د ښودلو ځانګړې سيمه او د نړيوالو انلاين الکترونيکو سوداګرو خدمتي سيمه هم پکې په لومړي ځل جوړه شوې وه، چې دا د چين او نړۍ اړتياوې پوره کولی شي.
د چين نړيوال وارداتي نندارتون په نړۍ کې د صادراتو تر سرليک لاندې يوازينی نندارتون او هم د چين د ورخلاصون د پرمخبېولو يو مهم ډګر دی.
څه موده مخکې، د چپن د کمونېست ګوند د شلمې مرکزي کمېټې څلورمه عمومي غونډه ترسره شوه، چې پکې په لوړې سويې د ورخلاصون د پراخوالي کارونه ترتيب او د ورخلاصون د پراخوالي مهمې دندې روښانه شوې دي.
د چين نړيوال وارداتي نندارتون د ورخلاصون د پراخوالي او د مثبت بدلون د څار مهمه کړکۍ بلل کېږي.
د چين ورخلاصون څه ډول ورخلاصون دی؟
د چين ورخلاصون يعنې چین له نړيوالو تړونونو او ژمنو پرته د ځاني پرمختګ پر بنسټ له نورو هېوادونو سره مثبت تعامل کوي او له خپلو مشخصاتو سره سم ګام په ګام دروازه پرانېزي.
د ورخلاصون پراخوالی د چين په دولتي ډيزاين او ستراتيژۍ کې شامل شوی، چې د دغه هېواد د ورخلاصون تګلارې د پلې کېدو ټينګ هوډ ترې ښکاري.
د چین د ټولنيزو علومو اکاډمۍ د نړيوال اقتصاد او سياست د څېړنيز مرکز مشر لياو فان سي اېم جي ته ويلي، چې د چين د ورخلاصون رېښه په همدې هېواد کې ده او له نړيوالو سره پر مثبت تعامل تمرکز لري او د عنعنوي نړيوالو اړيکو له هغو اصولو سره اړيکې نه لري، چې يو هېواد يوازې د نورو هېوادونو د ورخلاصون پر بنسټ خپله دروازه پرانېزي. د چين ورخلاصون څخه د دغه هېواد هغه ځاني باور او مسؤليت ښکاري، چې د ځاني پرمختګ پر بنسټ له نورو هېوادونو سره ګټې شريکوي.
اوسمهال په نړۍ کې يو اړخيزم او د ځاني سوداګرۍ ساتونکې کړنې د ډېرېدو په حال کې دي، نو ځکه بازار تر ټولو قيمتي سرچینه يادېږي. په ورته وخت کې ډېری پرمختيايي هېوادونه د پرمختګ لېوالتيا لري او په نړيوالې سوداګريزې پروسې کې د ګډون لپاره د ځاني پرمختګ په هڅه کې دي.
چين لوړه سویه لرونکی ورخلاصون لا پراخوي، چې دا نه يوازې له بازاري اصولو، بلکې د پرمختګ او د نيکمرغه ژوند د موندلو په برخه کې د خلکو له هيلو سره هم سمون لري او د نړۍ د هغو پرانيستو چارو لپاره يې ثابت عوامل برابر کړي، چې اوس په څلور لارې کې دي.
که کوم هېواد ورخلاصون پراخ کړي، نو لازيات پرمختګونه به ومومي او که پرمختګ وکړي، نو ورخلاصون به یې نوره هم ورسره پراخ شي.
د سينګاپور د دولتي پوهنتون د اسيايی چارو د څېړنيز مرکز غړي کشور مابوباني ويلي، که تاريخ ته کتنه ولرو، نو چين د ورخلاصون عنعنه به پکې ومومو.
څوک د نړۍ د پرانيستي تمايل مخه نه شي نيولی.
