ځینو رسنیو د عامې روغتیا وزارت د سرچینو په حواله خبر ورکړی چې روان کرنتین به له اختر وروسته نه غځېږي او رخصتي به نوره ختمېږي. په دغو خبرونو کې ویل شوي چې وزارت د روغتیا نړیوال سازمان د وروستیو سپارښتنو پر بنسټ له کرونا وبا څخه د هېوادوالو د مخنیوي په موخه تازه کړنلاره تر کار لاندې لري چې ژر به د حکومت له مشرتابه سره شریکه شي او د حکومت د مشرتابه تر غور او کتنې وروسته به کرنتین او عمومي رخصتي پای ته ورسېږي او دغه پرېکړه به هم په رسمي توګه اعلان شي.
که حکومت داسې یو ګام واخلي، دا به یو مناسب او غوره ګام وي. کرونا اوږده لانجه ده او داسې نه ښکاري چې ژر به ختمه شي. د دې تر څنګ کرنتین، ګرځبندیز، د کارونو او ورځنیو فعالیتونو بندول او عمومي رخصتي د دې ستونزې له حل سره خاصه مرسته نه کوي. ښايي دا چارې د کرونا د ځنډ سبب شي، خو هېڅکله د کرونا په مخنیوي کې اساسي رول نه شي لوبولی. له همدې امله له کرونا سره باید مبارزه روانه وي، خو کرنتین او ګرځبندیز باید ختم شي؛ ځکه چې له دې اړخه را ولاړېدونکي زیانونه د کرونا تر زیانونو په ځلونو زیات دي. په افغانستان کې کرونا ویروس د اروپايی هېوادونو، متحده ایالاتو، روسیې او ډېرو نورو هېوادونو په پرتله جدي نه دی، خو هلته ورو ورو کرنتین له منځه ځي. په روسیه کې چې هره ورځ پکې لس زره کسان پر کرونا اخته کېږي، بیا هم د روسیې ولسمشر کرنتین ختم کړی او په مشروط ډول یې کاروبار ته اجازه ورکړې ده. ډېری اروپايي او نور هېوادونه هم کرنتین ماتوي او هڅه کوي، خپل اقتصادي څرخ بېرته فعال کړي.
دا یو معقول او سم ګام دی چې افغانستان هم کرنتین او رخصتي ختمه کړي او پرېږدي چې اقتصادي فعالیتونه او د خلکو ورځنی ژوند بېرته پیل شي. البته د دې مانا دا نه ده چې هېڅ ډول تدابیر باید نه وي. ټول ممکنه تدابیر باید ونیول شي. د کرنتین له ختم سره سم باید نور تدابیر زیات شي. د بېلګې په ډول، په عامو ځایونو کې باید ضد عفوني کارونه زیات شي، د ماسک او نورو وسایلو کارول باید زیات شي. دغه راز ټوله هڅه باید وشي چې په کاروبار کې هم تر ممکنه بریده فاصله وساتل شي. داسې نه ده چې په ورځنیو کارونو کې د فاصلې مراعاتول شونې نه وي. ډېر اقتصادي فعالیتونه او ورځني کارونه داسې دي چې په طبیعي ډول پکې فاصله مراعاتېږي، خو په ډېری نورو کارونو کې هم شونې ده چې فاصله او تدابیر مراعات شي. د کار او اقتصادي فعالیتونو مانا دا نه ده چې حتمي به پکې کرونا خپرېږي او یا به تدابیر پکې تر پښو لاندې کېږي، بلکې دا چاره شونې ده. حکومت باید له خپله اړخه په دې برخه کې نه یوازې یوه تګلاره وړاندې کړي، بلکې په عملي کولو کې به یې هم هڅې کوي. خلک هم باید مرسته وکړي چې د کاروبار او اقتصادي فعالیتونو سره هممهاله تدابیر هم مراعات شي. په دې ډول به مو د کرونا د پراختیا بهیر هم پڅ کړی وي او د اقتصادي بحران مخه به مو هم نیولي وي.
