د هند په شمال ختیځ کې لاریونونه په تاوتریخوالي اوښتي چې له کبله یې شپږ کسان وژل شوي دي.
دا په داسې حال کې ده چې نږدې یوه اونۍ کې د دغه هېواد په شمال ختیځ کې زرګونو کسانو د تابعیت د نوي قانون پر وړاندې لاریونونه پیل کړي دي.
د دغه هېواد اوسېدونکي او په تېره بیا په شمال ختیځ اسام ایالت کې زرګونه کسان راپاڅېدلي او د هغه قانون د بېرته لغوه کېدو غوښتنه کوي چې له مخې یې هند ته له پاکستان، بنګله دېش او افغانستانه ورغلیو غیر مسلمان کډوالو ته د هند تابعیت ورکول کېږي.
دغه قانون د ډسمبر په ۱۱مه د هند پارلمان تصویب کړی دی.
د اسام ایالت په مرکز ګواهاتي ښار او په پلازمېنه نوي ډیلي کې لاریون کوونکو بسونو، ټرینونو او موټرو ته اورونه اچولي او له پولیسو سره یې نښتې کړې دي.
چارواکو ویلي، چې د لاریونونو له امله د دغه هېواد په ځینو برخو کې د ټرینونو تګ راتګ هم له خنډ سره مخ شوی دی.
په ورته وخت کې د لاریون کوونکو یوه تنظیموونکي او د مسلمانانو د ساتنې د ډلې په نوم د یوه ګروپ بنسټګر ارجیت اشد قریشي رویټرز خبري اژانس ته ویلي چې دوی په هېڅ صورت د دین په نوم تبعیض نه مني.
هغه زیاته کړې: «موږ اماده یو چې د حکومت هر سند ومنو، خو که د دین په نوم مسلمان ځورول کېږي او تبعیض ورسره کېږي، دا هېڅ د زغملو نه ده، مسلمانې ډلې به د دغو اقداماتو پر ضد پراخ لاریونونه وکړي».
لاریون کوونکو دغه راز خبرداری ورکړی چې تازه تصویب شوی قانون د هند د اساسي قانون پر خلاف دی او دوی سرغړونه ترې کوي.
د راپورونو له مخې، د پولیسو او لاریونوالو ترمنځ په ځينو سیمو کې نښتې هم رامنځته شوې چې مرګ ژوبله پکې اوښتې ده.
د چارواکو په خبره، تر دې مهاله لږ تر لږه څلور کسان د پولیسو په ډزو کې وژل شوي او دوه نور هم مخکې تر هغه وژل شوي وو چې معلومه نه ده چا ویشتي دي او لسګونه نور ټپیان شوي دي.
د یادونې ده چې ګڼو محصلینو هم په دغو لاریونونو کې برخه اخیستې ده.
