سناتوران: د افغان جګړې خصوصي کول به نا امنۍ لا پراخې کړي

د مشرانو جرګې ځينې غړي وایي، خصوصي کمپنیو ته د افغان جګړې سپارل به افغانستان د عراق او سوریې له برخلیک سره مخامخ کړي. دوی وايي: که د امریکا حکومت د افغانستان روانه جګړه بلک واټر خصوصي امنیتي کمپنۍ ته وسپاري، په افغانستان کې به جګړه لا زور واخلي او افغانستان به د عراق او سوریې په څېر د شدیدو جګړو شاهد وي. په ورته وخت کې سناتوران په اسلام اباد کې د افغان او پاکستاني عالمانو غونډې ته په اشارې وايي، چې په یاده غونډه کې دې د افغانستان روانې جګړې په تړاو شرعي فتوا ورکړل شي او پاکستان دې له افغان حکومت سره په خپلو کړو ژمنو ودرېږي. سناتوران دا څرګندونې په داسې حال کې کوي، چې په افغانستان کې روانه جګړه چې ورځ تر بلې د ګرمېدو په حال کې ده، اوس داسې ګنګوسې دي چې بهرني ځواکونه دلته په خپله جګړه کې ناکام دي او روانه جګړه به بلک واټر خصوصي امنیتي کمپنۍ ته وسپارل شي.