سویدن له افغان راستنېدونکو او زیانمنو ټولنو سره بشردوستانه مرسته کوي

د کډوالۍ نړیوال سازمان (ای او ایم) راپور ورکړی، چې سویدن په افغانستان کې د افغان راستنېدونکو او زیانمنو ټولنو د ملاتړ لپاره نوې بشردوستانه مرسته برابره کړې ده. د یاد سازمان د مالوماتو له مخې، دغه مرسته د راستنېدونکو د دوامدار ادغام، ټولنیز یووالي او د هغوی د اقتصادي وضعیت د ښه‌والي لپاره ځانګړې شوې ده. راپور زیاتوي، افغانستان دا مهال د کلونو جګړو، طبیعي پېښو، کورنیو بې‌ځایه‌کېدو او له ګاونډیو هېوادونو څخه د افغان کډوالو د پراخ راستنېدو له جدي ننګونو سره مخ دی. د ملګرو ملتونو په وینا، دا ۱۳ میاشتنۍ پروژه به په هغو سیمو کې عملي شي چې د راستنېدونکو شمېر پکې لوړ دی، څو د ټولنیز ګډون کچه لوړه، د عامه پوهاوي پروګرامونه پیاوړي او د محلي نوښتونو ملاتړ وشي.