بهرنیو چارو وزارت ویلي چې له پاکستان او چین سره یې د افغان سولې په تړاو غونډه کړې او دواړو هېوادونو د حکومت له لوري د بندیانو خوشې کول ستایلي، له طالبانو یې د تاوتریخوالي د کمولو غوښتنه کړې او د افغانانو په مشرۍ او مالکیت یې د سولې د خبرو ملاتړ کړی دی. حکومت وايي چې هڅې یې روانې دي، څو د سولې لپاره سیمهییزه اجماع پياوړې کړي او له همدې امله څو مهمې غونډې جوړوي.
د حکومت د سیمهییزې اجماع هڅې د څه لپاره دي او سیمه د سولې په پروسه کې د کوم دریځ ملاتړ کوي؟
حکومتي مشران هڅه کوي چې د سیمې د هېوادونو ملاتړ را خپل کړي او د سولې په برخه کې خپل دریځ پیاوړی کړي. له همدې امله یې له سیمه ییزو هېوادونو سره د غونډو نوې لړۍ پیل کړې ده. اوس په ټوله سیمه کې یوازې هند د سولې په تړاو د افغان حکومت د دریځ ملاتړ کوي او ایران هم له امریکا سره د ستونزو له امله یو څه متفاوت دریځ لري. د سیمې نور ټول هېوادونه د افغانستان د حکومت له دریځ سره ډېر جوړ نه دي او آن د حکومت کړنو ته د سولې په برخه کې د خنډ جوړولو په سترګه ګوري. د سیمې هېوادونه چې په افغان سوله کې خپلې ګټې ګوري، فکر کوي چې حکومت نه غواړي چې د سولې روانه پروسه بریالۍ شي. له همدې امله دوی د افغان حکومت د دریځ ننګه نه کوي. اوس چې حکومت ویلي، په وروستۍ غونډه کې پاکستان او چین د بندیانو د خوشې کولو ملاتړ کړی، دا سمه ده، خو دا هېوادونه غواړي چې پاتې بندیان هم خوشي شي، هغه چې حکومت یې نه غواړي. د دې تر څنګ بهرنیو چارو وزارت وايي چې سیمه د افغانانو په مشرۍ او مالکیت د سولې د خبرو ملاتړ کوي، دا هم سمه ده، خو دا هغه مانا نه لري چې حکومت یې ترې اخلي. حکومت خلکو ته ښيي چې ګواکې سیمه د هغو خبرو ملاتړ کوي چې مشري او مالکیت یې د افغان حکومت په لاس کې وي، خو د سیمې د هېوادونو موخه دا ده چې په دې خبرو کې باید مشري او مالکیت د افغانانو وي او بهرنیان باید د افغانانو لپاره خپله پرېکړې ونه کړي، بلکې خپله افغانان پرېږدي چې د سولې په تړاو پرېکړې وکړي. دا هم سمه ده چې د سیمې هېوادونه د تاوتریخوالي کمښت غواړي، خو ورسره سم د بندیانو خوشې کول او د بین الافغاني خبرو د پیل غوښتنه هم کوي.
د سولې لپاره د سیمې د هېوادونو ملاتړ او اجماع ډېره مهمه ده؛ له همدې امله پکار ده چې له دې اجماع د سولې لپاره پوره کار واخیستل شي. ښکېل اړخونه د دې پر ځای چې د خپل دریځ د پياوړي کولو او خپلو اهدافو لپاره د سیمې د هېوادونو دریځونه جوړ کړي، ښه ده چې د افغانستان د سولې او ثبات لپاره هڅې وکړي او داسې سولې ته لاره هواره کړي چې هر افغان پکې د عزت او امن خاوند شي.
