د چين دولت رئيس شي جين پينګ د نومبر په ۲۴مه نېټه د امريکا له ولسمشر ډونالډ ټرمپ سره ټليفوني خبرې کړې دي.
دواړو سیالانو تېره مياشت د کوريا جمهوريت په بوسن ښار کې لیدنه کړې وه او ډېرې مهمې هوکړې کړې وې.
شي جين پينګ ياده لیدنه د چين او امريکا د اړيکو د سالم پرمختګ د لوري د سمولو او د خوځنده ځواک د برابرولو رول او نړۍ ته يو مثبت پيغام بللی دی.
نوموړي ويلي، د چين او امريکا اړيکو له بوسن لیدنې وروسته ثابت او ښه پرمختګ موندلی او دا د دې ښکارندويي کوي، چې دواړه هېوادونه له خپلمنځي همکاريو ګټې اخيستلی او مقابله يې بیا دواړو خواوو ته زيانونه رسولی شي.
شي جين پينګ د دواړو هېوادونو ګډ برياليتوبونه او ګډه سمسورتيا د ليدو وړ منظر بللی او په خبره یې، دواړه خواوې دې دغه تمايل وساتي، پر سم لوري دې ټينګار ولري، د برابرۍ، درناوي او ګډو ګټو پر بنسټ دې همکارۍ زياتې او مسئلې دې کمې کړي، د خپلمنځي اړيکو لپاره دې د همکارۍ نوي فرصتونه برابر کړي او د دواړو هېوادونو او ګردې نړۍ خلکو ته دې ګټې ورسوي.
شي جين پينګ له ډونالډ ټرمپ سره په ټليفوني خبرو کې د تايوان مسئلې په اړه د چين اصول او دريځ بیا څرګند کړي او په ټينګار يې ويلي، چې چين ته د تايوان بېرته راتګ له دوهمې نړيوالې جګړې وروسته د منځته راغلي نړيوال نظم مهمه برخه ده او په خبره يې، چين او امريکا پخوا د فاشيزم او ميلتاريزم پر وړاندې ګډه مقابلې کړې وه او اوس بايد د دوهمې نړيوالې جګړې لاسته راوړنې ښې وساتي.
ټرمپ شي جين پينګ يو ستر مشر بللی او ويلي يې دي، چې په بوسن ښار کې يې له نوموړي سره په ازادې او خوشحاله فضا کې ليدنه کړې وه.
هغه د دواړو هېوادونو د اړيکو په اړه د شي جين پينګ له نظريو سره همغږي ښودلې او ويلي يې دي، چې اوسمهال دواړه هېوادونه د بوسن ملاقات د مهمو توافقاتو په پلي کولو بوخت دي.
ټرمپ زياته کړې، چين د دوهمې نړيوالې جګړې په برياليتوب کې مهم رول لوبولی او امريکا پوهېږي چې د تايوان مسئله د چين لپاره مهمه ده.
