د شين هوااژانس د خبر له مخې، د چين د دولت رئيس شي جين پينګ د بېشکيک پر ځايي وخت د جون د ۱۲مې نيټې په ماښام دغه ښار ته ورسيد او د قرفيزستان د ولسمشر سورونباي جينبيکوف په بلنه د دغه هېوادولسمشرۍ ماڼۍ ته ولاړ.
دواړو مشرانو په دوستانه فضا کې د چين او قرغيزستان تر منځ د عنعنوي دوستۍ، د خپلمنځي اړيکو د ښې راتلونکې په هکله بحثونه وکړل او د ګډوېعلاقې وړ مسئلو په هکله يې د نظريو تبادله وکړه.
شي جين پينګ په خوشحالۍ سره وويل چې د زاړه انديوال په کور کې ميلمه يم. له شپږو کلونو وروسته يو ځل بيا له قرغيزستان څخه ليدنه کوم. د دواړو هېوادونو د سياسي اړيکو د جوړېدو له ۲۷کلونو راهيسې د دواړو خواوو تر ګډو هلو ځلو لاندې دغه اړيکې ټينګې شوې، په سياسي چارو کې يو پر بل ټينګ باور لري، په اقتصادی برخه کې د ګډو ګټو پر بنسټ خپلمنځي همکارۍ پياوړې شوي، په امنيتي چارو کې يې يو له بل څخه ملاتړ کړی او په نړيوالو مسئلو کې يې يو له بل سره نژدې همکارۍ کړې دي. دواړه خواوې بايد د شانګهای د همکارۍ سازمان، د اسيا د متقابلو زده کړو او باوري تدبيرونو د شورا په شمول په څو اړخيز چوکاټ کې خپلمنځي همکارۍ ټينګې کړي، پر څو اړخيزتوب ټينګار وکړي، په ګډه د سوداګرۍ د ساتنې له غوښتنې او يو اړخيزتوب سره مخالفت کړي او د انسانانو د ګډ برخليک ټولنې د جوړولو لپاره فعال خدمت وکړي.
جينبيکوف د دواړو هېوادونو تر منځ اړيکو ته د چين د دولت رئيس شي جين پينګ له لوړې پاملرنې څخه مننه څرګنده کړه. هغه وويل چې روان کال د چين د ملي ولسي جمهوريت د جوړېدو له ۷۰مې کاليزې سره برابر دی او قرغيزستان په دې مناسبت ورته توده مبارکي څرګندوي او هېله يې وښودله چې چين لا ستر پرمختګونه تر لاسه کړي. قرغيزستان په نړيوالو چارو کې د چين اغيزو ته په درنه سترګه ګوري او غواړي د يو کمربند او يوې لارې په چوکاټ کې په پېلا بېلو ساحو کې د ګډو ګټو پر بنسټ له چين سره همکارۍ ټينګې کړي او د چين د اقتصاد د چټکې پرمختيا په فرصت کې د ذات البيني اړيکو د پياوړتيا هڅونه وکړي.
