د چین د کمونېست ګوند د مرکزي کمېټې عمومي منشي او دولت رئیس شي جين پينګ د جنورۍ په ۲۶مې نېټې د ویتنام د کمونېست ګوند له عمومي منشي تو لام سره ټیلیفوني خبرې کړې دي.
شي جين پينګ له نوموړي سره په خبرو کې ويلي، چې چین اوسمهال په ټولو برخو کې د یو عصري سوسیالیستي هېواد د جوړولو او د دوهم سل کلن هدف د ترلاسه کولو په لور روان دی او ویتنام بیا د ملي پرمختګ یو نوی دور پیل کړی دی.
نوموړي ويلي، دواړه هېوادونه دې د ګوند او هېواد د ادارې د تجربو په اړه تبادلې او متقابلې زده کړې پیاوړې کړي او د ګوند د حکومتولۍ کچه او د ملي حکومتولۍ توان دې لوړ کړي.
شي جين پينګ ويلي، چين او ويتنام دې پراختیایي ستراتیژۍ پیاوړې او د لوړې کچې متقابلې ګټورې همکارۍ ژورې کړي، د دواړو هېوادونو خلکو ته دې ډېرې ګټې ورسوي او په ګډه دې د سوسیالیستي عصريتوب په لور حرکت وکړي.
هغه زیاته کړې، دواړه خواوې دې په نړیوالو او سیمه ییزو چارو کې همغږۍ او همکارۍ پیاوړې کړي او په ګډه دې له تسلط سره مخالفت او د انسانانو د ګډ برخلیک ټولنې د جوړولو لپاره کوښښونه وکړي.
تو لام د چين د کمونېست ګوند له مرکزي کمېټې څخه مننه کړې، چې د ویتنام د کمونېست ګوند د ۱۴م ملي کانګرېس د بريالۍ غونډې په اړه یې ورته د مبارکۍ پيغام لېږلی دی. نوموړي له عمومي منشي شي جين پينګ څخه هم مننه کړې، چې د ویتنام د کمونېست ګوند د مرکزي کمېټې د عمومي منشي په توګه د بيا ټاکل کېدو په اړه يې هغه ته مبارکي او نيکې هيلې وړاندې کړې دي.
تو لام د سوسياليستي ګاونډيو هېوادونو ترمنځ د دوستانه همکاريو د ژورتيا لپاره د نوي سفر د پيل او له چين سره د لاس د يو کولو په اړه لېوالتيا څرګنده کړې ده.
