د چین دولت رئیس شي جین پينګ او د بلجیم پاچا فیلیپ لیوپولډ لویز ماري د اکتوبر په ۲۵مې نېټې د دواړو هېوادونو د ډیپلوماتیکو اړیکو د ټینګېدو د ۵۵مې کلیزې په مناسبت د مبارکۍ پيغامونه تبادله کړي دي.
شي جین پينګ په خپل پيغام کې لیکلي، چین او بلجیم له ۵۵ کلونو راهیسې د متقابل درناوي، مساوات او ګډو ګټو پر بنسټ همکارۍ کوي، اړیکو يې ثابت پرمختګ موندلی، په بېلابېلو برخو کې یې همکاريو ځلانده پايله ترلاسه کړي او د خلکو ترمنځ يې تګ راتګ زیات شوی دی.
نوموړي ويلي، هغه د چين او بلجيم د اړيکو پرمختګ ته په ډېره درنه سترګه ګوري او له پاچا فيليپ سره به په ګډو هڅو د دواړو هېوادونو د ډيپلوماتيکو اړيکو د ټینګېدو د ۵۵مې کليزې په درشل کې د خپلمنځي هر اړخيزو دوستانه همکاریزو اړیکو د يوې نوې کچې د لارښوونې او د چين او اروپايي ټولنې د اړيکو د سالم او باثباته پرمختګ لپاره نوي خدمتونه وکړي.
پاچا فيليپ په خپل پيغام کې لیکلي، بلجيم او چين د ډيپلوماتيکو اړيکو له ټینګېدو راهيسې پراخې او متنوع همکاریزې اړيکې جوړې کړې دي.
نوموړي ويلي، د چین دولت رئیس شي جین پينګ په ۲۰۱۴م کال کې له بلجيم څخه رسمي لیدنه کړې وه او هغې لیدنې ورته ځانګړې خاطرې وربښلې دي.
نوموړي باور ښودلی، چې دواړه هېوادونه به د تېرو ۵۵ کلنو لاسته راوړنو پر بنسټ د پرانيستې ډيالوګ، عملي همکاريو او متقابل تفاهم لوړولو ته دوام ورکړي. بلجیم به له چین سره متوازنې او متقابلې ګټورې اړیکې ټينګې کړي، د نړیوالو ننګونو په هواري کې به ورسره ګډې هڅې وکړي او سوله ییز، ثابت او دوامدار پرمختګ ته به وده ورکړي.
