په داسې حال کې چې د ټاکنو خپلواک کمېسیون د ټاکنیزو سرغړوونکو پر وړاندې د جدي اقداماتو خبره کوي، د افغانستان د ازادو او عادلانه ټاکنو بنسټ يا فیفا بیا وايي چې د کمېسيون ژمنې عملي نه دي.
د دغه بنسټ اجرایوي ريیس يوسف رشید ويلي چې د ټاکنیزو سرغړوونکو پر وړاندې د عملي اقداماتو لپاره ځانګړو مېکانېزمونو او تګلارو ته اړتیا ده.
نوموړي زیاته کړه چې کمېسیون باید له وړاندې د ټاکنیزو سرغړونو د مخنیوي لپاره ځانګړې مېکانیزمونه او تګلارې جوړې کړې وای.
رشید زیاته کړه: «په افرادو باندې موږ نه شو کولای چې دا موضوعات وڅېړو، مګر دا چې د هغه لپاره ځانګړي مېکانېزمونه جوړ شي او له پخوا نه شرطونه کېښودل شي، زه فکر کوم چې په اخر کې به د کاندیدانو لګښتونه له هغه حد نه چې کمېسون ټاکلي ډېر زیات وي او دا ژمنې به د کمېسیون د کمزورو کړنو له امله عملي بڼه خپله نه کړي او يوازې د کاغذ پر مخ به پاتې شي».
رشید وايي، دا د ټاکنو د خپلواک کمېسیون دنده ده چې د ټاکنيزو کمپاینونو پرمهال عدالت او توازن په پام کې ونیسي او هغوی چې له قانون نه سرغړونه کوي ورسره جدي چلند وکړي.
دا په داسې حال کې ده چې د ټاکنو خپلواک کمېسیون د میزان په شپږمه د ولسي جرګې د کمپاین په لومړۍ ورځ له کابل څخه ولسي جرګې ته۵۲ کاندیدان جریمه کړل.
د ټاکنو د خپلواک کمېسیون د رسنیو د کمېټې مشر رفیع رفیق صدیقي په کابل کې يوې خبري ناستې ته وویل چې ياد کاندیدان له دېرش زرو افغانیو، تر سل زرو افغانیو پورې جریمه شوي دي.
نوموړي پر رسنیو هم نیوکه وکړه چې د دوی له غوښتنې سره سره یې ځینې کاندیدان د کمپاین له وخت مخکې ور غوښتي او سرغړونه یې کړې ده.
د ټاکنو د خپلواک کمېسیون د معلوماتو له مخې د ټاکنيزو کمپاینونو په جریان کې د هر کاندید لپاره د لګښت اندازه، له اته لکو افغانیو نیولې تر دوه میلیونو او شپږ لکو افغانيو پورې ټاکل شوې ده.
د کاندیدانو له خوا یو بل ته د مزاحمتونو مخنیوی، د دولتي امکاناتو له کارولو او له سیمه ییزو، ژبنیو، مذهبي او قومي تعصبونو ډډه کول، د عامه نظم نه ګډوډول او د مالي لګښتونو رعایتول، په دې برخه کې د ټاکنو د خپلواک کمېسیون د لایحې عمده موارد دي.
د دغه کمېسیون ویاند او کمېشنر سید حفیظ الله هاشمي وايي، که د ولسي جرګې نوماندان له يادو مورادو سرغړونه وکړي له قانوني چلند سره به مخ شي: «نن يو ځل بیا دوی ته دا اعلان کوو چې سرغړونې مجازات لري، په ورته وخت کې موږ د لګښتونو د معلومولو او کنټرول لپاره لس کسه متخصصین هم ګومارلي دي نو هر څوک چې د قانون نه سرغړونه کوي ښکاره ده چې له قانون سره سم به مجازات کېږي».
دغه لس تنه متخصیصن د ټاکنو کمېسیون د رسنیو له کمېټې، چې دنده یې د ټاکنيزو کمپاينونو پرمهال د رسنیو څارنه ده، جلا کار کوي.
که څه هم د افغانستان د ازادو او عادلانه ټاکنو بنسټ يا فیفا د ټاکنیزو سرغړونو د مخنیوي په برخه کې د ټاکنو له خپلواک کمېسیون کړنې کمزورې بولي خو د دغه کمېسیون ویاند ډاډ ورکوي چې له ټاکنیزو سرغړوونکو سره به هېڅ ډول مراعت و نه شي.
