د روسیې او اوکراین تر منځ له نږدې شپږ کلن کړکېچ وروسته، د فرانسې حکومت تایید کړې چې د دواړو هېوادونو ولسمشران به په راتلونکې میاشت کې مخامخ سره وګوري.
د فرانسې د حکومت په خبره، پاریس به راتلونکې میاشت د اوکراین په اړه د څلور اړخیزې غونډې کوربه وي.
په غونډه کې به پر هغو پرمختګونو خبرې وشي چې د مېنسک د هوکړې پر اساس یې اټکل شوی و. فرانسوي چارواکو ویلي چې د اوکراین په اړه دغه غونډه به د ډسمبر په نهمه جوړه شي.
د راپورونو له مخې، د روسیې او اوکراین ولسمشران، ولادیمیر پوتین او ولادیمیر زېلېنسکي به مخامخ د فرانسې د ولسمشر ایمانوېل مکرون او د جرمني د لومړۍ وزیرې انګېلا مېرکل په حضور کې د اوکراین د ختيځو سیمو پر امنیتي وضعیت هم خبرې وکړي.
د اوکراین په تړاو د څلور اړخیزو خبرو دې لړۍ ته د نورمنادي فورمټ هم ویل کېږي.
د دغه فورمټ مخکینۍ غونډه چې د روسیې، فرانسې، اوکراین او جرمني استازو برخه پکې درلوده، د ۲۰۱۶ ز کال د اکټوبر په میاشت کې جوړه شوې وه، خو هغه مهال ولاديمیر زېلېنسکي د اوکراین جمهور رییس نه و.
زېلېنسکي به د اوکراین د ولسمشر په توګه لومړی ځل په پاریس کې د روسیې له ولسمشر سره د خپل هېواد پر وضعیت د خبرو لپاره مخامخ کښېني.
دا په داسې حال کې ده چې روسیې په ۲۰۱۴ ز کال کې د کرېمیا ټاپووزمه له اوکراینه جلا او له خپلې خاورې سره یوځای کړه.
له هغه راهیسې روسیه د اوکراین په ختیځ کې د هغو بېلتون غوښتونکو ملاتړ کوي، چې د اوکراین د حکومت پر ضد جنګېږي.
د بېلتون غوښتونکو او اوکرایني ځواکونو تر منځ په نښتو کې له هغه راهیسې ۱۳ زره کسان وژل شوي او په زرګونو نور ټپیان شوي دي.
د پاریس په څلور اړخیزه غونډه کې به هڅه وشي چې د اوکراین په ختیځ کې جګړې ته د پای ته رسېدو لار پيدا شي.
دا په داسې حال کې ده چې د فرانسې ولسمشر اېمانويل مکرون د روان کال په دوبي کې روسیې ته تللی و او د ولادیمیر پوتین په کور کې يې له هغه سره وکتل.
د مکرون مکررې هڅې چې له روسیې سره یې د خبرو د پیل لپاره کوي، په اروپا کې ضد او نقیض بحثونه هم پارولي دي .
هغه تېره اونۍ له ایکانومېسټ مجلې سره په مرکه کې وویل: «که موږ په اروپا کې د سولې ټینګښت او د اروپا د ستراتېژيکې خپلواکۍ جوړول غواړو، باید د روسیې پر وړاندې خپل موقف ته بیاکتنه وکړو».
تر دې وړاندې د قزاقستان پخواني ولسمشر، نورسلطان نظربایف ویلي وو چې دی تیار دی چې د روسیې او اوکراین د ولسمشرانو د مخامخ کتنې لپاره زمینه برابره کړي.
نظربایف د نومبر په ۱۲مه ویلي وو چې زېلېنسکي یې بلنه منلې او ولادیمیر پوتین ته یې هم معلومات ورکړي، خو ځواب ته يې منتظر دی.
