محسن داوړ: د پاکستاني پوځ ځکه نه خوښېږو چې د ترهګرۍ خلاف یو

د پښتون ژغورنې غورځنګ مخکښ غړي محسن داوړ د پښتون ژغورنې غورځنګ پر غوښتنو او د پوځ له لوري پر دوی د ترهګرۍ او غدارۍ تورونو لګولو په اړه واشنګټن پوسټ ورځپاڼې ته په یوه مقاله کې لیکلي، دوی له پیله تر اوسه د پاکستان د قوانینو په رڼا کې د خپل حق غوښتلو لپاره غږ پورته کړی دی خو پر دوی د ترهګرۍ او غدارۍ تورونه لګول کېږي. نوموړي زیاته کړې، دوی له پوځ څخه د هغو ورکو شویو کسانو پوښتنه کوي چې همدوی وژلي، تښتولي او په بیلابیلو نومونو یې ځورولي دي. داوړ څرګنده کړې، پښتانه د پنځه دېرش میلیونه نفوس په لرلو سره په پاکستان کې مېشت تر ټولو ستر قوم دی خو ورته هیڅ حقونه نه دي ورکړل شوي. نوموړي ویلي، دوی په پاکستان کې د اوسېدونکو نورو قومونو په څېر مساوي حقونه غواړي خو پوځ یې په ښکاره په غونډو بندیز لګوي، نیسي یې او ځینې وخت له وژنو سره مخ کېږي. نوموړي د خپلې مقالې په وروستۍ برخه کې لیکلي، د پاکستان پوځ له قانون سره ستونزه لري، هغوی هغه خلک د ځان بولي چې د طالبانو ملاتړ کوي. د نوموړي په وینا دوی یې ځکه نه خوښېږي چې په خپله خاوره د امن فضا کې ژوند کول غواړي او د ترهګرۍ خلاف دي.