نیویارک ټایمز: امریکایانو د افغانانو زرګونه جریبه ځمکې غصب کړې دي

امریکایي ځواکونو په افغانستان کې د خپل حضور پر مهال د عامو افغانانو زرګونه جریبه ځمکه غصب کړې وه. نیویارک ټایمز ورځپاڼه په یوه راپور کې وايي چې امریکايي ځواکونو په افغانستان کې د خپل حضور او ماموریت پر مهال زرګونه لنډمهالې او اوږدمهاله اډې جوړې کړې دي چې ددې اډو د جوړولو لپاره یې د عامو افغانانو زرګونه جریبه ځمکه غصب کړې ده. سرچینه کاږي امریکایي ځواکونو ان د خلکو زراعتي ځمکې غصب کړې دي او سره له دې چې د ځمکو خاوندانو یې د بېرته اخیستلو لپاره له قانوني لارو مبارزه کړې ده، خو ګټه یې نه ده کړې. سرچینه کاږي امریکایي ځواکونو د ځمکو د غصب له امله ځمکه والو ته هېڅ راز تاوان نه دی ورکړی په داسې حال کې چې شاوخوا شل کاله کېږي د ځینو کروندګرو ځمکې د امریکایي ځواکونو په اډو بدلې شوې دي. سرچینه وایي امریکایي ځواکونه وتلي خو د ځمکو دعوې او کشمکشونه لا هم د افغان ځواکونو او ځمکه والو ترمنځ روان دي، ځکه د امریکایانو اډې دمګړی له افغان سرتېرو سره دي.