د چین کمونېست ګوند د مرکزي کمېټې د سیاسي بیورو غړي، د دې کمېټې د بهرنیو چارو دفتر مشر وانګ يي د سپتمبر په ۲۸مه نېټه په بېجینګ کې د جاپان د نړیوالې سوداګرۍ د پرمختګ ټولنې له مشر تاکیشی ایوایا سره وکتل.
وانګ يي وویل، دغه ټولنه د چین او جاپان د خلکو د تګ راتګ یوه مشهوره ډله ده او تل د دواړو خواوو د دوستانه اړیکو د ټینګښت لپاره په هڅه کې ده. د دې ټولنې پخواني مشر، ښاغلی یوهی کونو یو با وجدانه سیاستوال و، چې د جاپان تېر تور تاریخ یې سم کتلی او د دې هېواد د میلیتاریزم د یرغل جرمونه یې منلي، نو د چین او ګاونډیو هېوادونو د خلکو د درناوي وړ و.
وانګ يي دې ته په اشارې سره چې راتلونکی کال د چین او جاپان د سیاسي اړیکو د ټینګېدو له ۵۵مې کلیزې سره برابر دی، وویل چې اوس د دواړو هېوادونو اړیکې بیا له ننګونو سره مخ دي. هغه هیله وښودله چې د جاپان دغه ټولنه او با خبره شخصیتونه به د جاپان حکومت وهڅوي چې له چین سره په اړیکو کې سم انتخاب غوره کړي.
ښاغلي تاکشي ایوایا وویل، اوس د جاپان او چین اړیکې د انديښنې وړ دي. د جاپان د نړیوالې سوداګرۍ د پرمختګ ټولنه به د پخواني مشر یوهې کونو د میراث او هیلو په تعقیبولو سره هڅه وکړي چې د دواړو هېوادونو اړیکې بیا د دواړو خواوو د څلورو سیاسي سندونو له اصولو سره سمون ولري.
