د چین د کمونیست ګوند د مرکزي کمېټې د سیاسي بیورو غړي او بهرنیو چارو وزیر وانګ یي د فبرورۍ په ۵مې نېټې په پلازمېنې بېجینګ کې د کیوبا کمونېست ګوند او حکومت له ځانګړي استازي، د کیوبا د کمونېست ګوند د سیاسي بیورو غړي او بهرنیو چارو وزیر برونو روډریګز سره ليدلي او دواړو هېوادونو پر اړيکو يې ورسره خبرې کړې دي.
وانګ يي له روډریګز څخه غوښتي، چې د چین د دولت رئیس شي جین پینګ صمیمانه نيکې هيلې ملګري راول کاسترو او رئیس ډیاز کانیل ته ورسوي.
نوموړي ويلي، چین د کیوبا د ملي حاکمیت او امنیت ټينګ ملاتړ کوي او په دغه هېواد کې د بهرنیو ځواکونو له غیر معقولې لاسوهنې سره مخالفت کوي او په خبره یې، چين به له کیوبا سره د دواړو هېوادونو د مشرانو اجماع پلې کړي او تر وسې به ترې ملاتړ او مرستې ورسره وکړي.
روډریګز له وانګ یي څخه غوښتي، چې د جنرال راول او رئیس ډیاز کانیل صادقانه هيلې رئیس شي جین پینګ ته ورسوي.
نوموړي کیوبا او چین وروڼه او ملګري هېوادونه بللي او ويلي يې دي، چې کيوبا به له چین سره د دواړو هېوادونو د مشرانو مهمه اجماع پلې کړي او په بېلا بېلو برخو کې به ورسره همکارۍ پیاوړې کړي.
